Paz y orden sa Masbate amay pig-aandaman kan Bikol PNP

An provincia nin Masbate liwat nasa listahan kan Philippine National Police (PNP) na kabali sa mga provincia sa nasyon na idedeclara bilang elections hot spot sa maabot na pirilian sa Mayo 2019 huli ta dai pa ngani nasikad an campaign period alagad nagkapera nang insidente nin pang-gagadan na pigtutubod may motivo political. An Camp Crame sa pamamayo ni PNP Chief Director General Oscar Albayalde nagpahayag na sa media na an Masbate kabali sa apat na mga provincia na yaon sa saindang listahan na magiging mainit na naman an pirilian lokal. Si Chief Supt. Arnel Escobal, regional director kan Bikol PNP amay nang pig-aandam an saindang tropa nganing magpadara nin augmentation force sa Masbate sa tahaw kan nagkapera nang mga insidente nin kriminalidad huli sa politica. Magigirumduman kan nakaagi sanang Barangay asin Sanguniang Kabataan elections kan Mayo 2018 halaba na an caso sa mga garadanan na iyo an may halangkaw na caso digdi sa Kabikolan. Perang decada nang nakakaagi an Commission on Election (Comelec) pig-dedeclara an provincia bilang iyo an elections hot spot sa mga provincia kan rehiyon cinco. An Bikol PNP mas pigtatawan nin prioridad an preparasyon sa paz y orden huli kan halangkaw na caso nin garadanan kun panahon nin eleksyon. Bako lang PNP an napadara nin augmentation force sa Masbate envez maging an 9th Infantry Division kan Philippine Army na may base sa Camp Elias Angeles, Pili, Camarines Sur. (dpa)