DUWA AN ALCALDE: Transaksyon sa LGU Garchitorena prakasado

November 8, 2018

Prakasado sagcod sa ngonian an pag-andam para sa 2019 annual budget kan Garchitorena, Camarines Sur mantang dai maka-miting an Municipal Planning and Development Council huli kan duwa an nagtutukaw na alcalde sa banwaan na ini.

 

Si Consejal Edwin Larra nagsabi sa entrevista kan Bicol Mail na dapat yaon na sa lamesa kan Sangguniang Bayan an proposed annual budget para sa nurong taon alagad dai pa naghihiro an MPDC mantang  dai pa nagpapahunod sa puesto si Alcalde Nelson Bueza nganing magsunod sa suspension order kan Capitolyo Provincial.

 

Piglalaoman na gigibohon nang P110 milyon an 2019 annual budget hali sa dating P107 milyon ngonian na taon.

 

Dawa na ngani nakakapirma na sa nagkaperang mga transaksyon kan LGU si Bise Alcalde Nonoy Simando bilang acting mayor alagad igwa pang ibang department head an padagos pang pigmimidmid an suspendidong alcalde.

 

Si Bueza, nanindugan na siya pa an alcalde kan saindang banwaan mantang igwa suboot siya nin ‘‘stay order’’ hali sa Malacañan na saiyang iginigilid an suspension order ni Gobernador Migz Villafuerte.

 

Prakasado an iba pang transaksyon sa municipio alagad sagcod nakadamay pa an sueldo kan 80 empleados kan nakaaging Oktubre 31.

 

Sinabi pa ni Larra na yaon na sa proceso an payroll kan mga empleados mantang pigpirmahan na ni Acting Mayor nganing maitao na an sueldo kan huring kinsinas kan nakaaging bulan.

 

Nakaabala sa proceso matapos dai magpirma an saindang accountant asin treasurer mantang dai pa siya pigmimidmid bilang acting mayor apesar na igwa nang documentos hali sa gobierno provincial kan Camarines Sur na siya an dapat magtukaw karibay kan suspendidong jefe ejecutivo.

 

Si Bueza, na bakong kaalyado ni Gob. Villafuerte sinuspende nin tolong bulan huli sa caso administrativo na sinangat ni Bise Alcalde Simando matapos magkua nin pribadong abogado an jefe ejecutivo na dai aprobado kan Sanggunian Bayan.

 

Si Vokal Badong Simando, pamayo kan Special Committee on Administrative cases sa junta provincial iyo an nagrecomendar kan suspension sa alcalde asin pinaboran kan inaapod na super majority kan SP.

 

 

 

 

 

Share on Facebook
Share on Twitter
Please reload