Implementasyon kan towing ordinance pig-aandaman na

November 8, 2018

Igwa nang interesadong towing company na acreditado kan Metro Manila Development Authority na nagpahayag kan saiyang intensyon sa City Hall tanganing iyo an mamahala sa pag-implementar kan ordinansa na posibleng an lugar kan impounding area sa itaas na barangay kan ciudad alagad mayo pang exactong petsa kun nuarin ipapasunod.

 

Si Consejal Joselito Del Rosario, pamayo kan Committee on Public Utility sa Sangguniang Panlungsod nagsabi an kagsadiri kan companya taga Santo Domingo, Albay nagkapera nang veces nag-aatendir sa mga miting kan saiyang komite, sa PNP asin PNP nganing maaraman kaini an mga gigibohon na pag-andam antes iimplementar an ordinansa.

 

Si Del Rosario iyo an padreno kan Ordinance No. 2018-018 ‘’An ordinance amending City ordinance No. 2006-065, expanding the wheel-clamp ordinance and authorizing the towing of abandoned, stalled and illegally parked vehicles, providing guidelines for dispositions of towed automobiles, and imposing penalties for violation thereof.’’

 

An ordinansa nakalusot sa Sangguniang Panlungsod sa sesyon regular kan Mayo 22, 2018 asin inaprobaran ni Alcalde John Bongat kan Mayo 29, 2018.

 

Pigtalaan nang iimplementar kan Agusto 1, 2018 alagad huli kan dai pa preparado asin mayo pang towing operator nagdesisyon si Alcalde Bongat na i-uktaba muna.

 

Pighahalat nalang ni Del Rosario an pinakahuring joint report kan Naga City Police Office asin Public Safety Office sa resulta kan saindang mga miting sa sektor kan negosyante orog na si mga apektado sa kalabaan kan Magsaysay Avenue.

 

Base sa ordinansa  an truck na nagsinutil sa ordinansa asin may cuatro mil na gross capacity weight mabayad nin multa na nagcacantidad P1,500 sa enot na apat na kilometro asin dugang na P400 sa cada sunod na mga kilometro pasiring sa impounding area.

 

Sa mga kotse, jeeps asin pick-ups na igwang gabat na cuatro mil kilos mamulta nin P1,000 sa enot na apat na kilometro asin dugang na P400 sa cada sunod na mga kilometros pasiring sa impounding area.                        (dpa)                                                                                                                                            

 

 

Share on Facebook
Share on Twitter
Please reload