P1.3B annual budget kan City hall sa ‘19

An Ciudad nin Naga na kabali na sa mga listahan sa ciudades sa Filipinas na ‘’billionaire city’’ pigpuponan na an deliberasyon kan propuestong P1.3 bilyon na 2019 annual budget sa Sangguniang Panlunsod cada aldaw nin viernes asin piglalaoman na matatapos sa enot na semana kan bulan nin Deciembre 2018.

Piglalaoman sa laog kan bulan nin Deciembre ma-aaprobaran na sa en banc session nganing antes magtalikod an taon 2018 aprobado na an 2019 annual budget, sabi ni Bise Alcalde Nelson Legacion.

Si Consejal Cecilia ‘’Nene’’ De Asis, pamayo kan Committee on Appropriation nagsabi na an saindang annual budget nurong taon inapod na People’s Budget Ordinance na nag-agi sa mga consultasyon sa Naga City People’s Council asin iba pang mga sektores antes pigsumiter sa opisina ni Alcalde John Bongat.

Naglangkaw nin labi sa dos milyones pesos an 2019 annual budget mantang ngonian na taon igwa sanang P1.1 bilyon, sabi pa kan consejal.

Kabali sa may dakulang prosupuesto iyo an Local Development Fund na nacacantidad nin P143 milyon, Urban Poor Program nagcacantidad nin P30 milyon, sa infrastructure – P28 milyon, sa Naga river – 13 milyon, sa disaster program na kabali digdi an pag-implementar kan drainage project – P62 milyon asin an iba padagos pang pigseserne sa committee level.

An Ciudad nin Naga nagpuon sa pagiging billionaire city kan 2017 asin nagpapadagos sagcod sa masunod na taon mientras an magagamit an dakulang fondo sa manlaen-laen na proyecto kan lokal na gobierno.

Sa pinakahuring datus kan Commission on Audit sa Bikol an Naga iyo an pinakamayaman na ciudad digdi sa rehiyon cinco. (dpa)