SA CASURECO II: Pagdakit kan manga poste puponan pa sana

An haloy nang isyu sa pagdakit kan mga electrical post kan Camarines Sur II Electric Cooperative (Casureco II), puponan pa sana sa Panganiban Drive sa kagabsan na 200 na mga poste sa Ciudad nin Naga na dapat gabuton nganing halion sa road right of way sa mga road widening project kan Department of Public Works and Highways (DPWH).

Masikad an pagdakit kan mga poste ngonian na semana na puponan sa lima sanang poste sa Panganiban Drive na apektado kan road widening project asin nagpangako na tataposon sa laog nin siyam na bulan o sa maabot na Hulyo 2019.

Si Engr. Alex Cruz, na nagrepresentar ki OIC General Manager Emelita Candia kan Casureco II nagpahayag nin asegurasyon sa pigtalaan na panahon kan relokasyon kan mag-atubang sa sesyon regular kan Sangguniang Panlungsod kan Martes, Noviembre 6.

Sinabi ni Cruz na an saindang problema iyo an mga cable TV wire asin linya kan mga telepono na nakaka-abala sa saindang trabajo, alagad sinabi ni Bise Alcalde Nelson Legacion dai dapat gibohon na dahilan ini kun ma-aabala an pagbalyo kan mga poste envez iimplementar an pagdakit mantang nagtapos na kan Agusto 31, 2018 si pigtalaan na panahon base sa pinaluwas na joint memorandum circular kan Department of Energy asin DPWH.

Pigdadahilan kan Casureco II na dai sinda nababayadan kan DPWH para sa relokasyon kan mga poste alagad an sabi kan kan 2nd Engineering District kan obras publika mabayad na sinda kun igwa nang accomplishment report an cooperativa ngaing mayong cuestion sa Commission on Audit.

Si Legacion, presiding officer kan SP nagsabi na andam an City Hall na magtabang na mapadali an saindang trabajo alagad dapat magcoordinar an cooperativa sa mga opisina kan City Engineer’s Office asin Public Safety Office.

Igwa nang pinasar na resolucion si Consejal Joselito Del Rosario na nagbilog nin grupo nganing magtabang sa Casureco II alagad kan panahon ini ni dating Project Supervisor/Acting General Nelson Lalas na garong dai interesado na tabangan sinda kan City Hall.

Alagad sa bagong manijamiento ngonian ni Candia, sinabi ni Engr. Cruz kaipuhan ninda an suporta kan personajes kan City Hall nganing mapadali an saindang trabajo sa relokasyon kan mga electrical post.

Kan panahon ni Lalas dai pigtawan nin prioridad an implementasyon kan pagdakit kan mga poste envez iyo an pagbakal kan milyones pesos na mga transformer.

Sa saiyang cuentada sa gagastuson na pagdakit kan mga poste inabot sa P16 milyon na babayadan kan DPWH, alagad cuestionable man ini sa obras publika huli ta sa saindang sadiring cuentada dapat P9 milyon sana.

Sa Joint Memorandum Circular kan DPWH asin DOE an obras publika iyo an mabayad kan gabos na gastos sa pagdakit kan mga poste nganing mahali na sa mga road right of way na apektado kan road widening project. (DPA)