DAWA BINALYONG DESTINO: Dr. Litam dai salbado sa caso

November 15, 2018

Ibinalyo na ni Secretary Francisco Duque III kan Departamento de Salud sa ibang hospital kan gobierno si Dr. Maria Estrella Litam sa Ciudad nin Valenzuela hali sa Bicol Medical Center sa Ciudad nin Naga alagad dai man dapat siya makalibre sa ginigibong imbestigasyon kan Malacañan.

 

Ini an mga pahayag ni Tammy Lee Jr, regional coordinator  kan Presidential Ant-Crime Commission (PACC) sa ginibong press conference sa Bicol Medical Center kan Lunes, Noviembre 12 na presente si OIC Dr. Francisco Sales asin iba pang mga opisyal kan hospital tanganing ipaliwanag na magiging operational na an 5th asin 8th storey building mantang pighahalat nalang an pag-isyu kan occupancy permit hali sa Bureau of Fire Protection sa Ciudad nin Naga.

 

An mga doctor man sana kan BMC iyo an may reclamo kontra sa pinahaling medical director na yaon na sa proceso an imbestigasyon asin malinaw sa panindugan kan opisina kan Presidential Anti-Crimen Commission sa Malacañan dawa ibinalyo na si Litam sa ibang hospital kan gobierno alagad igwa man giraray siyang sisimbagon sa caso, sabi pa ni Lee.

 

Si Dr. Litam dai paman makuanan nin reaksyon sa mga pahayag kan PACC contra sa saiya.

 

Dai man pigdetalye kan PACC an mga reclamo laban sa dating pamayo kan BMC envez halaton na muna ta maluwas man giraray an resulta kan imbestigasyon.

 

Pigbabasol kan Office of Presidential adviser for Bicol Affairs (OPAB) asin kan PACC si Litam sa naabalang operasyon kan bagong mga edificio kan BMC na dapat susog sa calendaryo nagfufuncionar na kan 2017 alagad duwang bulan nang antes kan taon 2019 dai pa giraray.

 

Bako kaming ‘’fault finder’’ an mawot kan OPAB asin PACC maging operational na an pigsasabing world class building kan hospital. Si Litam nagtukaw bilang pamayo kan hospital kan 2015 inaabot na nin 2018 inefficiency siya sa project monitoring asin durante sa proceso ‘‘she is not cooperative’’, sabi pa kan PACC regional coordinator.

 

Sa sinambit na press conference inuran nin mga sombong kan media an maluyang serbisyo kan hospital maging kan nagkapera sa mga doctor na kulang an atensyon sa pigdadarang mga emergency nang pasyente mala ngani igwa pang nagagadan na sana asin ini nangyari kan panahon ni Dr. Litam.

 

Si Dr. Sales, na iyo an pinaka-senior na doctor kan hospital naghagad na sana nin despensa sa mga mamundong sombong kan miembros kan media asin nagpangako na magkakaigwa sinda nin mga pagbabago sa manijamiento para sa toltol na serbisyo sa mga pigdadarang pasyente.

 

Pigcierto kaini na magkakaigwa sinda nin inobasyon oras na maging operational na an bagong mga edificio.

 

Huli ta Officer-Incharge an saiyang pagtukaw limitado man an saiyang poder alagad si aroaldaw na operasyon kan hospital kun igwang problema saiyang gigibohan tolos nin solusyon.                                        

                              (DPA)

 

 

 

Share on Facebook
Share on Twitter
Please reload