Madayang NFA rice retailers pinatanidan

November 15, 2018

Ciudad nin Legaspi – An National Food Authority nagpatanid sa saindang acreditadong nagpapatingi nin bagas kan NFA na mangbebentahe sa hababang presyo kan saindang bagas na ipapabakal sa presyo kan commercial rice.

 

Estrictong ipapasunod an one strike policy sa an arin man mabalga sasapoon ninda an magkakaninong penalidad kan ahencia, sabi ni regional manager Henry Tristeza.

 

Sinabi pa na an NFA Bikol nakatalaan sindang mag-implementar kan suggested retail price (SRP) sa  gabos na commercial rice sa rehiyon bilang pagsunod sa direktiba kan saindang opisina central.

 

An mga negociante pigmamandohan na magbugtak na kan SRP puon ngonian na semana alagad hinahalat muna ninda an guidelines sa central office sa Manila, mantang nakatalaan sindang magmiting kan inter-agency  nganing orolayan an implementasyon kaini.

 

Sa pinakahuring pag-monitor kan ahencia sa presyo  kan commercial rice ini naghuros na sa dos pesos cada kilo.

 

An pagbaba kan presyo kaini nangyayari epekto kan pagbarato man kan NFA rice hali sa dating P32 pigpako na sa P27 cada kilo mantang abunda na an saindang suplay sa mga mercado.

 

An pagbarato kan presyo kan paroy sa ngonian iyo man an reklamo kan mga paraoma, alagad an NFA Bikol nagsabi man na nagpuon na an saindang palay procurement program sa paroy  sa presyong P20.70 cada kilo hali sa dating P17.00.

 

Piglinaw pa kan NFA na an pagbaba kan presyo kan saindang bagas kasunod man kan kasugoan ni Deparment of Agriculture Secretary Manny Pinol sa tahaw kan nangyaring paglangkaw kan inflation rate sa nasyon na pigbabasol sa TRAIN law ni Presidente Rodrigo Duterte.

 

Share on Facebook
Share on Twitter
Please reload