Pagpadeportar ki Sis Fox, kinondenar

November 15, 2018

‘‘Habo si Presidente Duterte kan kritiko laban sa saiyang administrasyon orog na kun nagdedenuncia kan mga nangyayaring extrajudicial killings’’ kaya pinadeportar si Sister Patricia Fox.

 

Ini an mga pahayag kan Bagong Alyansang Makabayan sa Bikol mantang saindang kinokondenar an desisyon kan gobierno na manindugan na dapat ideportar an dayuhan na nagiging kritiko sa administrasyon huli sa isyu sa human rights violation.

 

Si Tess Pielago, regional coordinator kan BAYAN Bikol nagsabi na si Sister Fox, 27 años na sa Filipinas komo misyonaryo na nakakatabang sa mga nagtitios na familia bilang sarong religious person.

 

Suportado siya kan mga namamanuan Lomad, suportado siya kan namamanuan sa pakikipaglaban sa deretso humana, natabangan niya an mga nagtitios na Filipino na dai nagigibo nin mga politico, sabi pa ni Pielago.

 

An 72 años na madre nag-estar na sa Filipinas sa laog nin 27 taon nakalarga na kan nakaaging semana pabalik sa nasyon kan Austrialia, matapos ipa-deportar ni Duterte sa dahilan sa isyu na sarong undesirable alien.

 

Siya pig-blacklist kan Bureau of Immigration huli kan pagiging envuelto sa nagkaperang protesta kan mga progresibong grupo laban sa gobierno orog na sa isyu sa human rights violation asin extra judicial killings.

 

An immigration officials nakakolecta nin mga retrato kan Madre na nagpaparticipar sa mga protest rallies, kabali na an pagpugol kan placards na nangangapudan sa pagpaluwas kan mga detinido political.

 

Si Fox parte kan international fact-finding mission ngonian na taon sa isyu sa mga nangyayaring extra judicial killings sa Southern Mindanao.

 

Sa ngonian labi na sa viente mil an soboot biktima kan extra judicial killings huli kan ginigibong guiera kan administrasyon Duterte laban sa ilegal na droga.

 

An saiyang pagiging misyonaryo nagpaso na an visa sa tahaw kan mga ginigibong pag-apelar kan saiyang suportadores asin iba pang sektores na magpadagos pa kan saiyang misyon sa Filipinas alagad tinawan sana siya nin temporary tourist visa na nagpaso na kan Sabado, Noviembre 3.              (dpa)

 

 

 

 

 

 

Share on Facebook
Share on Twitter
Please reload