Pagbalad nin paroy sa nat’l highway pagsinutil sa PD 17

November 29, 2018

Canaman, Camarines Sur – Liwat nagpaluwas nin patanid an Department of Public  Works  and Highways (DPWH) na prohibido an pagbalad nin paroy sa gilid kan arin man na public highway o ano paman na bagay na nakakaulang sa trafico na pueding gikanan nin aksidente kan mga motorista.

 

An seksyon 13 kan Decreto Presidential 17 o mas midbid sa Highway Act nagsasabi na dai tinutugot kan ley na gamiton an porsyon o gilid nin tinampo nganing gibohon na baladan nin paroy, sabi ni Assistant District Engr. Richard Emmanuel Ragragio kan 2nd Engineering District kan DPWH sa Camarines Sur.

 

Kan panahon ni DPWH Secretary Rogelio Singson nagpaluwas nin Department Order No. 41 na nagmamanundo na dapat estrictong iimplementar an Seksyon 13 kan PD 17 nganing maseguro na mayong ulang an mga national highway.

 

An ahencia naghahagad nin cooperasyon sa mga lokal na gobierno nganing ma-implementar an ley alagad pabaya an mga opisyales lokal mantang harani na an eleksyon sa Mayo 13, 2018.

 

Nag-implementar nin mga road widening project an DPWH sa Camarines Sur maging sa iba pang provincia kan Kabikolan alagad an pinahiwas na tinampo ginagamit na komo baladan nin paroy.

 

Dakul na mga national road ginagamit nang baladan nin paroy bako lang kan mga ordinaryong paraoma envez maging kan mga darakulang comprador asin kaipuhan iimplementar na an ley.

 

Kun estrictong iimplementar an madadakop mamulta nin P1,000 sagcod sa anom na bulan na pagkakapreso defende sa diskresyon kan jusgado.                      (dpa)

 

Share on Facebook
Share on Twitter
Please reload