Special Action Force yaon na sa CamSur
An provincia nin Camarines Sur kabali sa pigpadarahan na kan sarong kompanya kan PNP Special Action Force (SAF) na nag-abot na kan Martes na hapon, Noviembre 27 hali sa Camp Crame kan Philippine National Police basado sa Memorandom Order No. 32 na pinaluwas kan palasyo Malakanyang na nagsusugo nin deployment nin tropa kan militar asin pulis sa mga provincia kan Samar, Negros Oriental, Negros Occidental asin Kabikolan.
Sinabi ni P/Sr. Supt. Engerbert Soriano, bagong OIC Provincial Director ini an resulta kan magkakasunodan na panghihipa kan rebeldeng New People’s Army na nangyari sa Barangay Napolidan, sa banwaan nin Lupi kan Oktubre 18 kun saen tolong pulis an binawian nin buhay asin sa Sitio Patag, Barangay Mambulo Nuevo sa banwaan nin Libmanan kan Noviembre 17 na anom na miembros kan Provincial Mobile Force Company an nairido.
An grupo kan SAF yaon muna sa PPO sa Brgy. Concepcion Grande, Ciudad nin Naga asin mahalat nin ano man na direktiba kun saen sinda idedestino alagad saro na sa pueding padarahan nin augmentation force iyo an banwaan nin Libmanan asin Lupi alagad defende pa sa pag-evaluar kan problema sa insurhencia dawa na ngani nakatuka an paglapag sa rebeldeng NPA sa Philippine Army.
Kakaiba man an magiging estilo kan pagwarak kan bagong tropa hale sa PNP - Special Action Force asin magdedefende pa sa coordinasyon kan 9th ID asin PPO.
An Camarines Sur PPO an may operational control sa grupo kan SAF troopers asin an Camp Crame sana an sa administrative control.
Nilinaw man kan opisyal na mayong koneksyon sa politica kan provincia an causa kan deployment na matutok sa lawless violence asin insurhencia. Enot naman sinabi kan militar sa Bikol na dikit na lang an mga rebeldeng NPA alagad bako ini an pinag basehan envez an saindang mga actividad siring kan mga panghihipa.
Kabali man sa mga lugar na pinangaranan ni Soriano na posibleng dagdagan nin tropa iyo ang banwaan kan Balatan, Bula, Ragay, Sipocot, Lupi asin iba pa.
Kasumpay kan nasabing deployment may paghandal man si Nelsy Rodriguez kan Bagong Alyansang Makabayan na makakadagdag lang ini sa halangkaw na bilang kan mga pagbalga sa deretso humana sa Camarines Sur.
Mientras tanto, sa pag-asumir ni OIC PD Soriano sa Camarines Sur PPO, saiyang papakusogon an koordinasyon sa Philippine Army nganing dai na maotro an insidente sa Lupi asin Libmanan. An pagka-gadan kan pulis, army o NPA an parejo lang madara nin kulog boot sa lambang mahal sa buhay kan mga taga Camarines Sur. (Melvin Machado)