Pagbaba kan edad sa criminal liability, sinisikwal sa consejo

January 24, 2019

Isinisikwal kan pamayo sa Committee on Children kan Sangguniang Panlungsod kan Ciudad nin Naga an pagkakalusot sa House Committee on Justice kan ‘‘substitute bill’’ na nagbaba kan edad kan criminal liability sa siyam hali sa quince años.
An Filipinas  saro sa mga nasyones na nagfirma sa UN Convention on the rights of the child na boot sabihon kaini kabali kita sa nagsusuporta sa age of minimum crime responsibility, Kun magiging ley an ‘‘substitute bill’’ pagsinutil ini kan satong nasyon.
Si Consejal Elmer Baldemero kan SP nanindugan na mantinido an panindugan kan consejo na tama sana an edad na 15 años na igwa nang sisimbagon sa caso kriminal an sarong aki na nag-eedad 15 años envez kan 9 años.
An consejal iyo an pamayo kan Committee on Children kan SP nagsabi pa na igwa na siyang pigpadrenohan na resolucion kan taon 2017 asin inaprobaran ninda sa consejo na dapat imantenir si dating edad na 15 años.
Dai man siya pabor sa propuesto sa senado na envez kan nieve años, isakat sa doce años.
An nieve (9) años, aki pa asin nasa grade III pa sana sa elementarya bako pang panahon na castigohon na ikulong dawa na ngani pigsasabi na envez kan carcel dapat ilaog sa Bahay Pag-Asa na yaon sa superbisyon kan Department of Social Welfare and Development (DSWD) hali sa lokal na gobierno asin igwang annual funding na piggagarantiya sa irarum kan General Appropriation Act (GAA).
Nagtutubod pa si Baldemoro na kun mayong lalaogan isasalak an aki sa mga carcelan kan mga gurang nang kriminal na mayong ma-itutukdong marhay sa menor de edad.
Kun digdi sa Ciudad nin Naga igwang Children Homes na puedeng digdi ilaog alagad sa ibang mga lugar sa Camarines Sur mayo pa kaini asin an mangyayari kun madadakop sinda kan pulis ciertong ilalaog sa selda, sabi pa kan consejal.
An bill saro sa mga prioridad ni Presidente Rodrigo Duterte huli kan naglalangkaw an mga caso na envuelto na an mga menor de edad.
Si Consejal Nene De Asis, pamayo kan Bantay Familia nagsabi man na dai sinda uyon sa lakdang kan congreso huli ta lumbod pang marhay an aki na nag-eedad nin 9 años.
Pabor man an consejal na dapat igwang sisimbagon sa ley an magurang na pabaya asin na envuelto sa criminal liability an saindang aki na menor de edad.          

(DPA)

Share on Facebook
Share on Twitter
Please reload