SA CAMARAJA BAJA Dugang na bed capacity sa BMC, lusot na sa komite

Matapos maaprobar sa committee on health an dugang na bed capacity sa BMC nagpakuang retrato sinda (hali sa wala) Dr. Wulfrando Ricarfort Jr., Dr. Francisco Sales III, Congresista Gabriel H. Bordado asin Dr. Efren Nerva. (retrato hali sa FB ni Cong Bordado)

Sa laog sana nin tolong bulan, an House Committee on Health pinalusot na kan Martes, Enero 22 an bill ni Congresista Gabriel H. Bordado kan tercer distrito kan Camarines Sur na nagdudugang kan bed capacity sa 1,500 hali sa 500 sana kan Bicol Medical Center (BMC), pinakadakulang hospital sa rehiyon Bikol. An bill saro sa prioridad kan lehislador kan Camarines Sur mantang grabe na an populasyon kan hospital mala ngani an iba haros taraid na sa katre na naheheling mismo ini kan mga opisyal kan BMC. Afuera sa dugang na bed capacity kabali na an upgrading kan mga service facilities, dugang na mga doctor asin nurses na madudugangan pa nin fondo an BMC. Sinabi ni Bordado an saiyang House Bill No. 8276 na pigsuportaran ni DOH Secretary Francisco Duque, Rep. Angelina Tan, pamayo kan Committee on Health sa Camara-Baja asin kan mga opisyales kan BMC, maagi pa sa plenaryo asin isusunod sa senado na nakatalaan padrenohan kan saiyang mga amigong senador nganing maging ley. Nag-atendir sa committee hearing sinda Dr. Francisco Sales III, OIC Medical Director kan BMC asin saiyang mga pag-iribang doktor na sinda Efren Nerva asin Wulfrando Ricafort Jr. An HB No. 8276 ‘’An Act increasing the bed capacity of Bicol Medical Center from 500 to 1,500 beds, upgrading the service facilities and professional health care therein, and upgrading funds therefor’’. Kun maging ley an bill, sinabi man ni Dr. Sales dakulang bagay mantang padagos na naglalangkaw an numero kan mga pasyente aroaldaw na piglalaog sa saindang hospital asin kaya nang ilaog sa saindang bagong mga world class na edificio. Sa datus an presenting lomang edificio inaabot nin 800 na mga pasyente an dinadara digdi mala ngani an iba yaon na sa salog. An presenting bed capacity kan BMC dai pa kabali an 200 na mga pasyente na piglalaog sa Don Susano Hospital sa Brgy. Cadlan, Pili, Camarines Sur na yaon sa superbisyon kan BMC. (DPA)