Naga bakong hotbed sa droga dawa dakul dakop na dorogista

January 31, 2019

SUNOD-SUNOD an mga nagkakadarakop na envuelto sa ilegal na droga sa Ciudad nin Naga kan Naga City Police Office alagad kun dakul an operasyan dai nangangahulogan na ‘’hotbed’’ sa droga an ciudad.

Higos lang kan mga operatiba asin sa tabang kan comunidad sagcod na nagiging positibo an inpormasyon nganing matalikop an mga dorogista.

Ini an mga pahayag sa Bicol Mail ni P/Supt. Errol Garchitorena Jr. jefe kan Intelligence Branch kan Naga City Police Office matapos saindang recibihon an komendasyon hali sa City Hall kaibanan si City Director Felix Servita Jr.

Saiya piglinaw na kun dakula nang cantidad an saindang nakukumfiscar na shabu dai man nangangahulogan na tataghan na nin droga an Ciudad nin Naga alagad nagiging agihan sana sa transaksyon sa ilegal na actividad.

Matapos kan flag raising ceremony kan Lunes, Enero 28 sa City Hall sinda Servita asin Garchitorena nagrecibe kan tinaong komendasyon hali sa ciudad sa pamamayo ni Alcalde John Bongat huli sa sunod-sunod na mga nagkakadarakop kan mga nagtutulak nin droga.

Afuera   sa duwang halangkaw na opisyal, kabale pa sa komendasyon iyo an 45 miembros kan NCPO na may mga ranggong police superintendents, police inspectors, PO3, PO2, SPO1, SPO2, PO3, asin P01.

An resolucion na nagtataong onra  sa NCPO kasunod kan mga ginibong operasyon kan Enero 12 kaibanan an elementos kan SDEU, 93CIP, 9MIB, 9ID kan Philippine Army naglansar nin duwang buy bust

operations na nagresulta sa pagkakakumfiscar kan 1.07 kilograms nin shabu.

An enot na operasyon sa kaparejong aldaw nagresulta sa pagkakakumfiscar kan 1.072 grams nin shabu asin pagkakadakop sa duwang acusado na sinda Jude Lizano y Alegre asin Romelyn Banday Lizano, kan Zona 1 Brgy. Caluag.

Saro naman na acomplisimiento iyo pagkakakumfiscar kan 0.639 na gramos nin shabu matapos saindang mapalibot sa Brillantes compound sa Bgry. Sabang si Roderick Alteza alagad nagprobar na maglaban sa operasyon kaya binadil gadan kan awtoridad.

An resolucion na nagtataong onra sa NCPO, pigpadrenohan ni Consejal Elmer Baldemoro asin

pigsegundaran ninda Consejales Vidal Castillo asin Sonny Ranola.

 

Share on Facebook
Share on Twitter
Please reload