STL magpapadagos dawa ipapundo kan City Hall

January 31, 2019

Maparalisar man an operasyon kan Small Time Lottery (STL) sa Ciudad nin Naga na pinapadalagan kan Evenchance Gaming Corporation, alagad magpapadagos an bola kan number games kasunod kan pagtugot na kan mga banwaan sa Camarines Sur.

Nagpuon an STL kan Deciembre 2018 sa Ciudad nin Naga alagad an gobierno lokal kan ciudad nagcocontra sa STL mala ngani nagsangat na nin petition for injunction sa corte si Abogado Jun-jun Bragais, City Legal Officer.

An caso yaon sa sala kan Regional Trial Court Branch 23 asin nakatalaan bistahan sa Febrero 8.

Si Provincial Manager Jobet Ramos kan Philippine Charity Sweeptakes Office (PCSO) sa Camarines Sur nagpahayag na dakul nang mga LGUs an nag- isyu nin business permit para sa operasyon kan STL na pinamamahalaan kan Evenchance, kun ipapundo kan kan City Hall sa paagi kan court order mayong magiginibo magsunod.

Sinabi kan PCSO Camarines Sur kun mangyari man ipapundo an Evenchance sa Naga dai man mapililay an STL mantang nagkapera nang mga LGUs an nagtao nin permiso sa koleksyon sa saindang banwaan.

Kabali na sa mga municipalidad na ini iyo an Canaman, Magarao, Pamplona, Sipocot, Pili, Ocampo, Balatan, Sagnay, Buhi, Libmanan asin iba pang mga banwaan.

An LGUs, PNP asin PCSO igwa makukuang kahirasan hali sa ingreso kan Evenchance.

An Evenchance legal an operasyon asin igwa sindang franquicia sa PCSO central office.

Saro sa isyu kan City Hall iyo pagsayuma ninda na mag-isyu nin business permit alagad sa lado kan Evenchance nagprobar na sinda magkua nin permit sinayumahan sinda kan ciudad.

Base sa charter kan PCSO an STL puedeng magpadagos kan operasyon sa sarong lugar dawa mayong permit an LGU huli ta yaon ini sa jurisdiksyon kan ahencia nasyonal arog kan mga Lotto Station.

Napag-araman na nag- aandam nang magbalyo sa Pili, Camarines Sur an STL Station kun pahalion na ini sa Naga.

Pigpaliwanag kan PCSO an ano man na kahirasan ninda sa ingreso nadalagan an fondo sa mga charity program kan ahencia. (dpa)

Share on Facebook
Share on Twitter
Please reload