Seseguradohon dai na mapalyar - Legacion

January 31, 2019

MAGIGING estricto na an lokal na gobierno kan Ciudad nin Naga sa paglaog sa contrata sa waste to energy (WTE) facility nganing marealisar na an proyecto sa paagi kan term of reference na dapat magdeposito muna nin treinta por ciento an investor sa cantidad kan proyecto alagad ibubuelta man sana ini oras na maimplementar na an facilidad. Habo nang mangyari kan City Hall si nagpalyar na waste-to-energy facility kan C.G. Global Corporation, sabi ni Bise Alcalde Nelson Legacion.

Pigtatawan na nin prioridad na marealisar na an facilidad sa basura na maconverter sa enerhiya mala ngani nagkapera nang veces nagkaigwa nin special session na nakatutuk sana an agenda

sa WTE.

Sinabi ni Legacion na saro pig-aadalan kan Technical Working Group (TWG) na ipatama an singil sa tipping fee nganing dai magsibog an investor huli ta tibaad malugi sinda kun barato an bayad kan ciudad.

An investor mabutas nin labi sa P1 bilyon asin kaipuhan magkaigwa man sinda nin ingreso dawa na ngani maproducer nin enerhiya hali sa basura na ipapabakal sa cooperativa nin electricidad.

Si Engr. Joel Martin, jefe kan Solid Waste Management Office (SWMO) nagsabi na nakakakolecta nin noventang (90) toneladang basura aroaldaw asin puedi ining maconvertir sa 1.2 megawatts na kuryente.

Kan Hulyo 2018 an AgriPower, sarong companiya na experto sa kaaraman sa teknolohiya sa WTE sa Estado Unidos na naka-establiser na nin mga waste-to-energy-facility sa 60 ciudades sa USA, nag- atubang na sa Sangguniang Panlungsod asin saiyang pigpaliwanag an WTE Combustor Thermal Technology sa St. Mary AgriPower Assembly Plant sa Pennsylvania na puedeng i-adaptar sa Ciudad nin Naga.

Sa paliwanag ni Edgardo Rivera representante kan companiya, sinabi kaini sa mapopruducir nin enerhia hale sa basura puedeng magkaigwa nin ingreso an ciudad nin sagcod sa P50 milyon.

Sinabi pa kan bise alcalde na maagi sa proceso sa bids and award committee antes sinda maglaog sa contrata sa arin man na investor nganing maseguro na makapili an City Hall nin calificadong investor asin madagos an proyecto, habo nang maliwat si nagpalyar na C.G. Global Corporation siyam nang taon an nakakaagi.

An WTE ikokonstruhir sa diez hektarya lote sa Barangay San Isidro, kataid kan nagpapadagos na proyecto sa sanitary landfill. (dpa)

Share on Facebook
Share on Twitter
Please reload