SA BMC Dugang na facilidades maaprobaran antes kan pagsara sa 17th congress

MATAPOS makalusot sa committee on health sa Camara-Baja piglalaoman na maaprobaran an House Bill 8276 ni Congresista Gabby Bordado kan tercer distrito kan Camarines Sur antes magsara an 17th Congress mantang nagkapera nang congresista an mawot maging co-author.

An propuestong ley para sa dugang na bed capacity, dugang na mga doctor asin nurses asin upgrading kan mga facilidades kan Bicol Medical Center (BMC) na saro sa pighahalat kan manijamiento kan hospital huli ta igwa nang bagong world class na edificio na ginastosan kan gobierno nasyonal kan panahon ni dating Presidente Benigno Aquino III nin maabot sa P1.2 bilyon.

Sinabi ni Bordado tamang-tama an pagtukaw ni Congresista Rolando Andaya Jr. kan premir distrito kan Camarines Sur komo chairman kan poderosong Committee on Appropriation.

An bill dadarahon sa komite ni Andaya nganing matagamahan nin fondo mientras nagcierto nin suporta an congresista huli ta an BMC pigdadarahan nin ginatos na pasyente hali sa manlaen-laen na banwaan kan Camarines Sur.

Sa presente igwa sanang kakayahan na mag-ako nin pasyente hasta sa 500 alagad kun maaprobaran an bill ni Bordado gigibohon na ining 1,500 asin an upgrading kan mga facilidades sagcod sa bagong mga medical equipment.

Si Congresista Angelina Tan, pamayo kan Committee on Health sa Camara-Baja pigsuportaran an bill kan lehislador kan tercer distrito kan Camarines Sur asin na- aprobaran sa committee level na presente an mga opisyales kan BMC na sinda OIC Medical Director Dr. Francisco Sales III, Dr. Efren Nerva asin Dr. Wulfrando Ricarfort Jr.

Sinabi pa ni Bordado oras na mahawas na sa Camara- Baja an saiyang bill si Senador Bam Aquino iyo man an mapadreno kaini sa senado.

An bagong mga edificio kan BMC piglibot na ni Secretaryo Francisco Duque asin Usec Nestor Santiago kan Departamento de Salud kan sinda magbista sa hospital kan nagtalikod na taon.

(dpa)