Rehabilitasyon kan PNR yaon na sa proceso, sabi

February 7, 2019

Maabot sa 6 mil na pidasong relis kan train na gagamiton sa rehabilitasyon tolong taon nang naka-stock sa PNR Station kan Ciudad nin Naga.                                                                                                  (DPAureus)

Lomang kotse kan PNR

 

An  haloy  nang  pangiturogan  kan  mga  Bikolano  na  marealisar  na  an viaje kan Philippine National Railways (PNR), sa ngonian yaon pa sana sa proceso an rehabilitasyon na saro sa flagship projects kan administrasyon ni Presidente Duterte sa lindong kan ‘’Build, Build, Build’ infrastructure program.

 

Pig-download na an cantidad P800 milyon sa opisina ni Secretaryo Arthur Tugade kan Department of Transporation (DOTr) na inisyal na fondo para sa aspeto teknikal sa rehabilitasyon kan perokarril, sabi ni Presidential Adviser for Bicol Affairs (PABA) asin dating Juez Marvel Clavecilla.
Si Chairman Roberto Lastimoso kan PNR iyo an nagkumfirmar kaini ki Usec Clavecilla asin Presidential Anti-Corruption Commission (PACC) Dante Jimenez sa saindang pag-aram kan kamugtakan kan total rehabilitation kan PNR.
An pagbuhay kan PNR’s south railway puponan sa Paco, Manila hasta sa provincia nin Sorsogon digdi sa Bikol hali sa uutangon na fondo sa China na nagcacantidad nin P175 bilyones na babayadan sa laog nin viente (20) años na igwang dos por cientong interest per anum.
Bilang PABA kan Malacañan an dakulang proyecto sa perokarril saro sa pigtatawan nin prioridad kan Usec nganing marealisar na an pangiturogan kan Bikolano na maibuelta na an viaje kan Bicol Express.
An 683-kilometrong  South Line magkakaigwa nin siyam na estasyon kan train sa Paco, FTI, Los Banos, Ciudad nin Lucena, Gumaca, Pili, Camarines Sur, Ciudad nin Naga, Ciudad nin Legaspi, Camalig, Albay, Ciudad nin Sorsogon asin Matnog, Sorsogon.
An China, enot nang nagpangako na tatawan ninda nin prioridad an south railway rehabilitation and restoration sa administrasyon Duterte na posibleng taposon hasta sa 2022.
An contruksyon kan linya kan perokarril haling Manila hasta sa Bikol pig-award sa construction firm kan China.
Sa maabot na eleksyon nagkapera nang mga nagcacandidatong senador an nagpapangako na saindang tatawan nin prioridad na na marealisar na an perokarril huli ta dakulang bagay ini sa mga  Bikolanong pasajeros na barato an flete kun ikukumpara sa mga buses.
Alagad sinabi kan PABA na saiyang piglalaoman na an mga politicong ini mataong bilog na suporta sa proyecto kan PNR bako lang sa pangako ngonian na eleksyon.  (dpa)

Share on Facebook
Share on Twitter
Please reload