SA PAKAWAT NIN BIKOL ‘19 Dai papakiaraman nin mararaot na manga elemento - DepEd

February 7, 2019

Dai papakiaraman kan mararaot na mga elemento an nakatalaan na Pakawat nin Bikol (Palarong Bicol) 2019 na gigibohon sa Ciudad nin Masbate dawa na an provincia nin Masbate nagkakaigwa nin mga kariribokan  kun panahon nin eleksyon.
Nag-asegurar kan matuninong na paz y orden an Philippine National Police (PNP) asin dai ninda nahehelingan na papakiaraman kan mararaot na mga  elemento an sarong semanang Pakawat nin Bikol na mapuon sa Febrero 24.
Ini an mga pahayag ni Direktor Rehiyonal Gilbert Sadsad kan Departamento de Edukasyon (DepEd) sa Bikol kan makuanan nin entrevista kan Bicol Mail sa ginibong Youth Congress sa Jesse M. Robredo Coliseum kan nakaaging semana.
Siya dating nadestino na bilang School Division Superintendent kan DepEd Masbate sagcod na inabot nin eleksyon na nagkakaigwa pa nin mga insidente kun panahon nin politica alagad aram kaini na sa mga actividades kun Palakawat nin Bikol dai naman pinapakiaraman an mga bisitang delegado.
An PNP Provincial Office kan Masbate asin gobierno provincial igwa nang mga koordinasyon tanganing maseguro na maging matuninong an panahon kan pakawat mantang rinibo an bisita an mapuon nang mag-arabotan sa masunod na semana.
Nagpapadagos an mga ginigibong pag-andam kan pakawat asin nasa 80 por ciento nang preparado an DepEd na nagtatarabangan sinda kan lokal na gobierno sagcod sa mga billeting center.
Nagkapera nang veces nagkaigwa sinda nin miting sa mga technical officials sa provincia nganing aramon an iba pang mga kakulangan na dapat tawan nin prioridad kan DepEd asin kan LGU, sabi pa.
Sinabi pa kan pamayo kan DepEd Bikol na na-iiba sa Masbate kumpara sa Ciudad nin Naga na nagkapera nang veces naging presentador kan Pakawat nin Bikol na parating andam sa pakawat huli ta igwa nang dating mga sports facilities mantang sa Masbate an iba pigtatapos palang.
An pakawat paparticiparan kan treceng debisyon nin mga pampulikong escuelahan kan rehiyon cinco, pitong ciudades kan Naga, Iriga, Legaspi, Ligao, Sorsogon, Tabaco, asin Ciudad nin Masbate.
Kan nagtalikod na taon an Pakawat nin Bikol ginibo sa Ciudad nin Naga. (dpa)

Share on Facebook
Share on Twitter
Please reload