Atrasadong infra proj binabasol sa manga ulang na estractura

January 24, 2019

An mga ulang na estractura, poste kan mga cooperativa nin electricidad asin kan mga telephone company (Telcos) iyo an mayor na causa kan na-atrasadong pagtapos kan road widening project sa Bikol kan Department of Public Works and Highways (DPWH).
Bako lang sa Camarines Sur asin Camarines Norte envez sa iba pang provincias kan rehiyon cinco, an resulta kaini iginilid muna kan DPWH an mga road widening project ngonian na 2019 sagcod dai nahahali an mga ulang sa mga national road dai dapat mag-implementar an ahencia.
Ini an mga pahayag ni Engr. Esmeraldo Sarmiento, assistant regional director kan DPWH kan makuanang nin entrevista kan Bicol Mail kasunod kan maluyang acomplisimiento sa Bicol kan pagtapos kan mga road widening project na pinabulosan nin multi-million peso kan saindang opisina central.
Sa 2nd Engineering District kan DPWH sa Baras, Canaman, Camarines Sur sinabi ni Assistant District Engr. Richard Emmanuel Ragragio kun igwa sindang P1.4 bilyon na fondo sa infrastructure project kan 2018 alagad ngonian na 2019 naghuros ini sa P700 milyon mientras na dai makakaimplementar kan mga road widening project sagcod na dai nagkakaharali an mga estractura o edificio asin poste.
Maging sa DPWH sa Daet, Camarines Norte sinabi ni Engr. Ricardo Guitterez iyo man an saindang problema na igwa pang pendiente si pagtapos kan mga proyecto kan 2018 huli kan mga ulang sa tinampo.
Nagpadara man nin noticia an DPWH sa mga apektadong edificio na dapat haralion an yaon sa laog kan road right of way igwang nagsusunod asin dakul pa an nagsisinutil sagcod na mag-arabotan an caso sa corte.
Kabali sa nakaabala iyo an dai tolos nag-implementar nin pagdakit kan mga poste an mga cooperativa nin electricidad sa Bikol mantang pighahalat an fondo sa relokasyon kan mga poste hali sa opisina central kan DPWH.

 

OROLAY SA PROYECTO. Si PABA Marvel Clavecilla nasa wala, DPWH Regional Director Virgilio Eduarte asin mga District Engineers sa Bikol pigtutukar an atrasadong road widening project huli kan mga ulang na estractura sa mga national road na kabali sa pigrereclamo an mga poste sa electricidad asin Telcos. (DPA)


Maging an mga poste asin kable kan Telcos na dai nagcocooperar sa DPWH alagad an aksyon kan opisina ni Presidential Adviser for Bicol Affairs Marvel Clavecilla sa paagi kan paglinaw kan National Telecommunication (NTC) kun an poste yaon sa jurisdiksiyon kan city o municipal asin sa provincial road sinda an may poder na magpahali mantang kun national road an DPWH iyo an dapat magsugo sa Telcos.
Saro sa ehemplo kan DPWH iyo pakikipag-tagasan pa kan ibang pribadong kagsadiri nin edificio sa M.T. Villanueva Ave na nagiging causa kan abalahon na trabajo kan contratista sa pagpahiwas kan tinampo.
Kabali pa sa isyu iyo an pagpaluwas nin temporary environment protection order kan corte sa Ciudad nin Naga na pundohon an pagpurotol nin puon nin kahoy apesar na nagsunod na sinda sa pigmamando kan DENR.                      

(DPA)         
 

Share on Facebook
Share on Twitter
Please reload