Brioso buelta sa puesto, armado nin stay order

February 13, 2019

Libmanan, Camarines Sur. Nakabuelta sa puesto si suspendidong Alcalde Bernard Brioso sa banwaan na ini matapos makakua nin stay order hali sa Malacañan, petsado Febrero 6.
Kinumfirmar kan alcalde na siya na an pigmimidmid kan mga empleados kan lokal na gobierno asin hinagad niya an cooperasyon kan mga opisyales lokal na magtrabajo na sinda envez kan pamomolitica.
Alagad an ibang mga miembros kan Sangguniang Bayan dai siya pigrereconesir na mawot  pang  maberifikar an documentos kan stay order na hali sa Malacañan.

 

 

SOLIDARITY WALK. Pinangenotan kan Naga City Police Office, BFP, mga escuelahan, Muslim community asin iba pang mga sektores nganing kundenaron an ginibong pagpasabog nin bomba sa Jolo Cathedral asin sa  Zamboanga City Mosque.                                                                      (NCPO)


Kan nakaaging Enero 30, 2019 si Bise Alcalde Rommel Bulaong iyo an pigreconesir kan DILG Bikol sa paagi kan pinaluwas na certificasyon ni Direktor Anthony Nuyda bilang Acting Mayor alagad nagsarong semana sana siya nakabuelo sa trabajo matapos kan apat na bulan sa controvercia sa pagkaigwang duwang alcalde kan saindang banwaan.
Kan Febrero 8, 2019 nabigla naman siya kan magpaluwas nin memorandum sa mga department head an nagbabalik na jefe ejecutivo.
Piglinaw kan balik alcalde na genuine an saiyang pugol na stay order mala ngani aram na kan opisina rehiyonal kan DILG Bikol.
Huli sa caso administrativo, si Brioso na bakong kaalyado sa politica ni Gobernador Migz Villafuerte sinuspende nin anom na bulan puon kan Deciembre 21, 2018 asin kun dai niya piglaban legal an caso sagcod nakaabot sa Malacañan maabot an eleksyon sa Mayo 13, 2019, suspendido pa siya.
Nakabuelta man siya sa posisyon duda an mga empleados na magkakaigwa naman nin controvercia sagcod na maparalisar an mga transaksyon finansyal asin apektado naman an saindang sueldo.

Share on Facebook
Share on Twitter
Please reload