Obispo Alarcon may apelo sa mga botante, candidato



Press Conference. Si Most. Rev. Rex Andrew Clement Alarcon, DD, (sa tahaw) Bishop-Elect kan Daet, Camarines Sur nag-atubang sa mga kahapotan kan miembros kan media na saro sa naging tema an ‘’The Year of the Youth’’ asin sa nakataan na episcopal ordination asin pagpatukaw sa saiya bilang Obispo kan Daet, Camarines Norte. Sa wala niya si Padre Louie Occiano asin sa too si Padre Darius Romualdo. (DPA)


Sa mga botante magpili nin marhay na candidato, sa mga manggaganang candidato dapat sincerong maserbe, mapakarhay an kabuhayan kan mga tawo asin isikwal an kurapsyon. Ini an pigtawan punto ni Most. Rev. Rex Andrew Clement Alarcon, DO, Bishop-Elect kan Daet, Camarines Norte kan makuanan nin entrevista kan Bicol Mail matapos kan ginibong press conference sa Archbishop Residence sa saiyang mga pag-andam sa pigtalaan na episcopal ordination sa saiya sa Metropolitan Cathedral, Ciudad nin Naga sa Marso 19 asin installation sa Marso 20, 2019 alas 10:00 nin aga bilang Obispo kan Daet sa Most Holy Trinity Cathedral. An Diocese naging bakante kan Febrero 2, 2017 matapos manombrahan si Obispo Gilbert Garcera, D.D. komo Arsobispo kan Lipa. Si Alarcon iyo na an ika-apat na obispo kan Daet. Hinagad kan pinaka-joven na Obispo sa mga botantes na dapat maging mahusay asin ciertohon an pagpili nin marhay na candidato asin bako lang sa pagpili envez tabangan man an candidato asin maelihir na tunay na makakapagserbe, na igwang pag-asenso an namamanuan. Sa mga candidato na gabos boot manggana sa pirilian lokal asin nasyonal ‘’lugod an satuyang pang-gana ito talagang makakapakarhay kan kabuhayan kan mga tawo bako para sa saindang interes’’ ‘’Huli ta an paglingkod bako para sa satuyang sadiri asin sa totoo kaiyang mamamate ta may talagang bonga kan satong kapagalan kun talagang sincero an satuyang pagserbe’’. Sinabi pa na dificil an bagay na ini alagad ano man na paglingkod bakong facil huli ta an pagpakarhay nin mga bagay, pagpakarhay kan sadiri dai nadadara sa madaling paagi, magtarabangan kita asin hingohaon ta bako sanang sadiri ta an isipon envez an karahayan kan kagabsan, sabi pa kan bagong Obispo. An mensaje kan Obispo sa tahaw kan pagsikad na kan campaign period sa mga candidatong senador na nagpuon kan Febrero 12. Sa pag-atubang niya sa press conference sa Ciudad nin Naga, nagpasalamat man siya sa saiyang panahon na pagserbe asin nakuang experiencia sa haloy na panahon sa Archidiocesis nin Caceres. (DPAureus)