REHABILITASYON SA DAÑOS SA INFRASTRAKTURA Php 9-B pig-indorso na kan OPABA ki Duterte

Pig-indorso na kan Office of Presidential Adviser for Bicol Affairs (OPABA) an Php9 bilyon ki Presidente Rodrigo R. Duterte na hinahagad na fondo kan Department of Public Works and Highways (DPWH) para sa rehabilitasyon kan manga daños sa infrastractura na winalat ni Tropical Depression ‘Usman’ sa Bikol.

Si PABA asin dating Juez Marvel Clavecilla nagpahayag sa Bicol Mail na matapos kan mga ginibong inspeksyon kan mga personajes kan DPWH sa manga daños sa tulay, tinampo asin iba pang infrastraktura kan ahencia sa mga provincia sa Kabikolan, saiya nang narecibe an damaged report asin kaipuhan na fondo kan DPWH Bikol nganing matagamahan nin fondo an daños sa infrastractura kan nakaaging calamidad. Sa pigsumiter na kaipuhan na fondo kan DPWH na pinamamayohan ni Direktor Rehiyonal Virgilio Eduarto, sinabi ni Clavecilla nag-abot ini sa Php9 bilyon na saiya nang pig-indorso ki Presidente Duterte. Nagtutubod an PABA na tatawan prioridad ni PRRD na matagamahan nin fondo an DPWH Bikol mantang aprobado na sa congreso an Php3.7 trillion na national budget. An OPABA na binugtak ni Presidente Duterte, saro sa saindang misyon iyo an pag-aram kan problema asin kaipuhan kan rehiyon Bikol nganing matabangan kan Malacañan. An Presidente kan magbisita sa Camarines Sur matapos kan nakaaging tropical depression nagpangako na oras tunawon na kan congreso an Road Board an multi-billion pesos na road user’s tax gagamiton para sa flood control projects sa Bikol, na nagsapo kan mahiwas na hararum na mga pagbaha asin pagrasay nin daga huli kan TP ‘Usman’. Afuera kan hinahagad na fondo para sa rehabilitasyon sa mga proyecto sa infrastraktura, an DPWH Bikol asin OPABA magtatarabangan nganing mapadali an pig-iimplementar na proyecto sa lindong kan ‘’Build, Build, Build program’’ kan administrasyon ni Duterte. An OPABA asin DPWH sa pamamayo ni Direktor Eduarte nagpermahan sa sarong memorandum of understanding (MOU) nganing magtarabangan an ahencias para maparikas an implementasyon kan mga proyecto kan gobierno. An MOU nagtataong awtorisasyon sa OPABA na magconducir nin validation and review kan mga proyecto na pig-iimplementar kan opisina rehiyonal maging kan district engineering offices sa rehiyon kan Bikol. (DPAureus)