Paggilid sa implementasyon kan excise tax, sinikwal kan Malacañan, DoF-AKB

February 21, 2019

Sinikwal sana kan Malacañan asin Department of Finance an propuesto kan nagkaperang lehislador na dai na muna iimplementar an 2nd trance kan excise tax sa diesel, kerosene asin iba pang excise fuel taxes sa irarum kan Tax Reform for Acceleration and Inclusion (TRAIN) law.
Si AKO Bicol Party-list Representative Alfredo Garbin nagpahayag sa press conference sa Ciudad nin Naga na saro siya sa nakapirma sa resolucion na envez kan pag-implementar kan ika-duwang hornada nin excise tax sa produkto nin petrolyo dapat maging estricto na an Bureau of Internal Revenue asin Bureau of Custom sa saindang koleksyon sa buwis.
‘‘An sakuyang panindugan dai na muna iimplementar an 2nd trance kan excise tax envez kaipuhan sanang maging eficiente an koleksyon nin buwis kan gobierno na kayang takupan an makokolekta sa excise tax’’
Dakulang cuarta kan gobierno an nalulustay sa kurapsyon pag-abot sa koleksyon sa buwis sa Bureau of Custom asin BIR, pokomas-uminos P260 bilyon, iyan an dai nakokolecta kun nalaog ini sa caja kan gobierno dai na kaipuhan mag-imponer kan excise tax ngonian na 2019, sabi pa ni Garbin.
Sinabi pa na pighagad ninda ini sa Malcañan asin sa DOF na pugolon muna an implementasyon alagad posibleng dai nagtitiwala na ma-aapektaran sana an ‘‘fiscal situation’’ kan satong gobierno asin dai mapupondohan an ibang aspeto kaya dinagos an implementasyon kan excise tax.
Pigbuyagyag pa kan AKO Bicol Party-List Representative, kun susunodon sana an Bureau of Custom Modernization Act na magbakal nin state of the art na x-ray machine nganing maheling an mga laog kan container asin mababawasan si tax evasion seguradong makokolecta si tamang koleksyon sa buwis asin dugang na ginatos na milyones pesos na makokolecta asin malaog sa caja kan gobierno.
Sagcod ngonian dai pigtatagamahan nin fondo an x-ray machine nganing makabakal kan ahencia.         (DPAureus)
 

Share on Facebook
Share on Twitter
Please reload