City Hall nag-aandam na kan ipapatindog na 5-storey bldg. sa porsyon kan NCPM

Hinahalat na kan Sangguniang Panlungsod kan Ciudad nin Naga an pinakahuring pag-aadal kan City Engineer’s Office (CEO) kun pera an kinakaipuhan na fondo sa planong ipapaconstruhir na limang escalon na edificio sa gagabaon na porsyon kan Naga City People’s Mall (NCPM), sa may pag-ultanan kan Kalye Zamora asin Salog Naga na igwang mahiwas na parking spaces asin mga puesto na ookuparon nin mga negosyante. Si Consejal Vidal Castillo, pamayo kan Committee on Market Affairs kan SP nagsabi na kaipuhan ninda an pinal na estimate kan CEO mantang igwa nang mga lugar kan fresh fish section kan mercado an naghuhurolog na an mga semento asin naglalataw na mga kabilya na delicado sa aksidente. Sa enot na rekomen-dasyon kan CEO kinakaipuhan na an rehabilitasyon asin retrofitting huli kan mga insidente nin kasulo sa mercado kan mga nakaaging taon. Sinabi ni Castillo na naheling niya mismo an kamugtakan kan fresh fish section na an irarum kaini delicado na huli kan padagos na naghuhurolog an semento. Prueba kaini, igwa pang pigsumiter na mga retrato sa saiyang komite si Market Supt. Ramon Florendo. Enot nang pigrerecomendar na magastos an City Hall nin sagcod sa P400 milyon sa ipapatindog na limang escalon na edificio alagad kaipuhan kan SP an final estimate nganing magpasar sinda nin resolucion na nagtataong awtorissyon ki Alcalde John Bongat sa pag-utang kan dakulang cantidad sa bangko. An plano sa rehabilitasyon asin konstruksyon saro sa prioridad ni Alcalde Bongat, an mercado iyo an pinakadakula sa South East Asia. Pigbuyagyag pa kan consejal an mercado, na ngonian nag-eedad na nin labi sa cincuenta (50) años pinatindog kan taon 1960 kan panahon ninda dating Diputado Ramon Felipe, Jr. asin Alcalde Vicente Sibulo. Sinabi an plano kan City Hall an limang escalon na edificio magkakaigwa nin multi-level parking nganing makatabang sa padagos na problema sa trafico sa Central Business District I. Pig-asegurar pa kan namamayo sa committee on market affairs na si ma-aapektaran sa rehabilitasyon asin kontruksyon kan mercado tatawan nin babalyohan na puesto nganing magpadagos kan saindang negosyo asin matatawan man giraray nin prioridad nganing makakua nin puesto sa mercado. Kun dai marealisar an proyecto ngonian na premirong cuarto kan taon 2019 posibleng iimplementar pakatapos kan pirilian sa Mayo 13, 2019, sabi pa.

(DPA)