CSO panlaban sa epekto kan El Niño

February 28, 2019

Pili, Camarines Sur – An cloud seeding operations (CSO) saro sa plano kan Department of Agriculture (DA) sa Bikol nganing matabangan an sektor nin paraoma sa epekto na dadarahon kan El Niño Phenomenon.
Sa ngonian padagos nang namamatian an tag-init asin igwa nang kaomahan na nag-aalang na maging an mga tinanum na gugulayon na maresulta sa production loss sa agricultura sa rehiyon.


An Philippine Atmospheric, Geophysical and Astronomical Services Administration (PAGASA) nagpaluwas nin aviso kan mamation na init nin panahon huli kan El Niño Phenomenon sa mga bulan nin Marso hasta Hunyo.


Alagad sinabi ni Emily Bordado, regional spokesperson kan DA Bikol saro sa lakdang kan ahencia iyo an pagbugtak nin mga solar-powered irrigation system asin nagkapera nang banwaan sa Camarines Sur an nagiging operational na afuera kan dugang na itutukdok na pig-asegurar ni Agriculture Secretary Manny Pinol bilang dugang na ayuda sa Bikol na kaipuhan mapatubigan an saindang tinanum na paroy kun dai na inaabot kan patubig kan National Irrigation Administration.


Pig-aktibar na kan DA an task force El Niño nganing amay sindang makaandam arog kan ginibo ninda kan manga nakaaging administrasyon.


An CSO saro sana sa interbensyon kan Departamento de Agricultura laban sa El Niño, sabi pa.
Nagkaigwa na nin campaña para sa amay na pagtanum alagad naabala matapos kan nagkaperang calamidad an nag-agi sagcod nang nadestroso siring kan nangyaring tropical depression ‘Usman’.


Sinabi pa kan DA Bikol na nagtao na sinda nin bagong banhi sa mga paraoma  nganing makabawi kan saindang pagkakalugi huli kan ‘Usman’ mantang igwa man manlaen-laen na klase nin banhi   nin  paroy na puedeng makua sa mga Municipal Agriculturist Office (MAO) na kakayahon an init o panahon nin paltik huli kan epekto kan El Niño.


An CSO piglansar na kan panahon ni  DA Sekretaryo Prospero Alcala na nagkaigwa sinda nin memorandum of agreement (MOA) entre kan Department of National Defense (DND), nganing ipagamit an aircraft hali sa Fuersa Armada sa Departamento de Agricultura.


Kun marealisar an CSO magamit sindang ‘asin’ bako  si  ginagamit sa pagluto nganing iyo an iwawarak sa panginuron kan aircraft sa mga lugar kan agricultural areas nganing iyo an magpabagsak  kan  uran para daing gayo maapektaran kan El Niño an mga aanihon sa produkto agricultural.  (DPAureus)
 

Share on Facebook
Share on Twitter
Please reload