GMA mabugtak karibay ni LRay

February 28, 2019

Yaon na an bola ki House Speaker Gloria Macapagal-Arroyo kun nuarin madesignar nin caretaker sa segundo distrito kan Camarines Sur matapos kan noventa (90) diyas na preventive suspension ki Congresista Luis Raymond ‘LRay’ Villafuerte kan Fourth Division kan Sandiganbayan.  


Igwang reglamento an Camara-Baja na puedeng magdesignar nin caretaker o encargado sa bakanteng distrito kun an elihidong congresista nasuspendi sa puesto.


Si Congresista Rolando Andaya Jr. kan premir distrito kan Camarines Sur asin pamayo kan poderosong Committee on Appropriation sa Camara-Baja nagsabi yaon sa poder kan House Speaker kun siisay an saiyang papatukawon na encargado sa distrito na temporaryong nabakante sa laog nin 90 dias.
Alagad an papatukawon na caretaker dapat an congresista na yaon sa kataid kan segundo distrito arog kan tercer distrito kan Camarines Sur na yaon digdi si Congresista Gabriel H. Bordado Jr. asin an premir distrito ni Congresista Andaya.


Pinahayag man ni Bordado na dai siya interesado na maging caretaker mientras na dakul pa an saiyang pigtatawan nin prioridad sa tercer distrito na sakop an Ciudad nin Naga asin pitong mga municipalidad.

 
Si Andaya dai naman nagkumfirmar kun interesado siya na maging tomatawo sa distrito na suspendido an congresista.


Si dating Vokal Carlo Batalla iyo an nagsangat nin caso sa Sandiganbayan na may Case No. SB-18-CRM-0406 – People vs Luis Raymund Villafuerte, Jr. et al.


Naging ugat kan caso na singangat kan dating vocal huli sa pagkua ni LRay nin security agency sa Capitolyo na dai nag-agi sa tamang proceso o dai nagkaigwa nin subasta kan siya iyo pa an gobernador kan Camarines Sur.


An Fourth Division na compuesto ninda Justice Alex Quiroz, chairman asin an mga miembros na sinda Justice Reynaldo Cruz asin Justice Bayani Jacinto iyo an nakapirma sa desisyon.


An congresista kan segundo distrito pigsumiter na an saiyang sadiri sa voluntad na pag-ako kan preventive suspension kan corte sa paagi kan saiyang pinadarang surat sa House Speaker.


Oya si parte kan saiyang surat ‘’While I firmly believe that only the House of Representatives has the authority to discipline its members, I … am nonetheless voluntarily submitting (myself) to the preventive suspension,’’ sa saiyang paglinaw sa surat na pinadara ki Speaker Arroyo.


Sa desisyon kan Sandiganbayan petsado Enero 30, 2019 an suspension nagpoon kan Febrero 11 hasta sa Mayo 12. An caso huli sa graft charges  sa transaksyon sa gobierno provincial sa suboot anomalia sa pagkua nin segurity agency.


An suspension pinaluwas kan corte huli kan pagbalga kan Acta Republica No. 3019, o mas midbid sa Anti-Graft and Corrupt Practices Act. (dpa)

Share on Facebook
Share on Twitter
Please reload