NFA CSur abunda sa bagas, alagad namumundo sa RTL

February 28, 2019

Pili, Camarines Sur – Abunda an stock nin imported rice sa bodega kan National Food Authority sa Camarines Sur mantang padagos pa an pagsuplay sa sainda kan pig-angkat na bagas hali sa Vietnam alagad posibleng sundo na sana sa Septiembre 2019 huli kan pag-epekto kan controvercial na Rice Tarrification Law (RTL).


Hahalian nang regulatory power an NFA kabale na digdi an pagpundo na ninda sa pagsuplay nin NFA rice sa saindang mga acreditadong retailers sa mercado mantang dai na maangkat nin imported rice an gobierno matapos itao na sa pribakong sektor huli kan RTL.


Sinabi ni NFA Provincial Manager Alan Sabaybay sa ngonian igwa pa sindang 60 mil na sakong stock nin bags asin igwa pang nag-aabot na imported rice hali sa 600 mil na sakong bagas na babarangaon kan anom na provincia kan Bikol na ipapadara kan saindang opisina rehiyonal.


An saindang alokasyon sa mga NFA rice retailers si tama sana tanganing maseguro na igwa sindang naka-andam na food security encaso igwang mangyaring calamidad. 


Magpapadagos an saindang palay procurement sa presyong P20 cada kilo, P17 kaini hali sa NFA asin an P3 cada kilo hali sa fondo kan Departamento de Agricultura bilang saindang support price nganing ma-enganyar an mga paraoma sainda na magpabakal kan inaning paroy.


Matamlay an mga empleados kan ahencia huli kan dai dinangog ni Presidente Rodrigo Duterte an saindang pagcontra sa Rice Tarrification Law huli ta oras na mag-epekto na an ley ciertong rinibong empleados asin opisyal an mahahalian trabajo sa NFA.


An mga empleados asin paraoma kinukundenar an ginibo sa sainda ni Senador Cythia Villar na iyo an nagpadreno kan bill sa senado bilang pamayo kan Committee on Agriculture asin si Presidente Duterte na pinermahan an Rice Tarrification bill.


Si Silvester Bonto, presidente kan National Confederation of Irrigators Association nagpahayag na saindang dadarahon an isyu sa Corte Suprema huli ta disventajeng marhay sa sektor nin paraoma asin paborable sa dati nang mayayaman na rice traders. (dpa) 

Share on Facebook
Share on Twitter
Please reload