Consejal na nadakop sa droga nakabayad P400k na fiyansa

Lagonoy, Camarines Sur – Sarong re-electionistang consejal sa banwaan na ini na pigcoconsiderar kan PNP na numero uno sa municipal drug watch list an niramalan kan mga awtoridad matapos makua sa saiya an 19 pakete nin shabu na nagcacantidad nin P50 mil.

Si Consejal Randy Teoxon y Aserdano, 49 anos, may agom dinakop kan Lagonoy Municipal Police Station mga alas 8:00 nin banggui kan Febrero 28 sa paagi kan search warrant na pig-isyu ni Juez Manuel Rosales kan Regional Trial Court Court Branch 34 sa Ciudad nin Iriga.

Duwang aldaw sanang pinaturog sa Municipal Jail kan MPS, nakabayad tolos nin fiyansa na nagcacantidad nin P400 mil.

An drug operations kan mga awtoridad sa pamamayo ni Chief of Police PSI Alex Sumayao ginibo sa residencia kan consejal sa Barangay San Isidro Norte asin testigos kan mga pulis sa search operations iyo an mga opisyales de barangay, media asin representante hali sa DOJ.

Sinabi ni Sumayao, pigcoconsiderar kan Lagonoy MPS na No. 1 sa listahan sa municipio na envuelto sa ilegal na droga asin saindang consideradong high value target na haloy nang pigsusubaybayan kan mga awtoridad huli kan pagtulak kan ilegal na droga sa saindang banwaan apesar na elehidong opisyal.

Naging maulyas an suspechado kaya pinagmarhay kan MPS na magkua nin search warrant sa corte nganing sakyadahon an saiyang residencia na nakuanan nin mga pakete nin shabu.

Nag-aatubang na nin caso sa corte sa pagbalga kan Acta Republica 9165 o mas midbid sa Comprehensive Dangerous Drug Act of 2002.

Siya re-electionistang consejal sa maabot na eleksyon sa Mayo 13, 2019 sa ticket ni Ernesto Odiamar Jr. na candidatong alcalde kan Team One CamSur ni Gobernador Migz Villafuerte.

Antes siya na-elihir bilang consejal kan banwaan naging barangay kapitan kan San Isidro Norte. (dpa)