SK councilor igwa nang honorarium

Magkakaigwa na nin honorarium an elehidong mga Barangay Sanggunian Kabataan (SK) councilors sa veinte siete (27) barangay kan Ciudad nin Naga matapos aprobaran sa Sangguniang Panlungsod an ordinansa na may titulong ‘‘SK Empowerment Ordinance’’.

An ordinansa na pigpadrenohan ni Bise Alcalde Nelson Legacion asin co-author si Consejal Kyle Francine Tripulca, ex officio member kan SP na nagrerepresentar kan Sanggunian Kabataan, epektibo kan Febrero 28, 2019 asin ngonian na bulan nin Marso magkakaigwa na nin honorarium an SK Councilors kan ciudad.

An Ciudad nin Naga iyo an pinakaenot sa mga lokal na gobierno sa rehiyon Bikol na saindang piggirumdum an mga jovenes na lider sa barangay na dapat matawan man nin honorarium bako lang an saindang SK Chairman mantang nagiging katuwang sinda kan City Hall sa pagpadalagan kan good governance, sabi kan bise alcalde.

Base sa ordinansa cantidad P500 an saindang marerecibe kan lambang SK Councilor alagad magdedefende sa saindang attendance na iyo an babasehan kan saindang marerecibing allowance.

An fondo kukuanon sa Barangay Essential Service, mantang an SK Chairman an saindang honorarium kaparejo kan narerecibing honorarium kan Barangay Councilors.

Naobserbaran sa ibang mga barangay perang bulan matapos kan SK elections an mga elihidong SK councilors nademiter man sana sa puesto huli ta apesar nagtatrabajo sinda mayong narerecibing dawa dikit na honorarium envez an sainda sanang chairman. (dpa)