SA PETISYON KAN PHILRECA SA ERC: Pagpasa kan binabayad na buwis hagad ibasura

Sa paagi nin resolucion, hinuhurot kan Sangguniang Panlungsod kan Ciudad nin Naga sa Energy Regulatory Board (ERB) na ibasura na an petisyon kan Philippine Rural Electric Cooperatives Association (PHILRECA) na ipasa sa consumedores an real property tax (RPT) payments kan mga cooperativa nin electricidad.

Si Consejal Julian Lavadia Jr. miembro kan Committee on Consumers Protection sa SP iyo an padreno kan resolucion na pinaboran kan gabos na miembros kan consejo sa sesyon regular kan Martes, Marso 26 nganing saindang ipadara an kopya kan resolucion sa ERB asin sa Committee on Energy sa congreso.

Sa petisyon na pigsangat kan PHILRECA sa ERC, hinahagad ninda na dapat ipasa an saindang binabayad na buwis sa propriedad real sa monthly bill kan miembros-consumedores.

Pusog an panindugan kan SP na dapat dai ini iimplementar huli ta gabos na consumedores an apektado asin malangkaw an saindang electric bill cada bulan.

‘’Unfair and gravely disadvantageous to the consuming public because, if granted this will result to increase monthly electric bill’’ sabi pa sa resolucion ni Lavadia.

An PHILRECA na compuesto nin 121 mga cooperativa nin electricidad sa nasyon na kabale sa miembro iyo an Camarines Sur II Electric Cooperative (Casureco II) asin an tolo pang CASURECOs sa Camarines Sur asin an apektado digdi bako lang sa Ciudad nin Naga envez maging sa gabos na mga ciudades asin provincia, sabi pa ni Lavadia kan makaolay kan Bicol Mail.

Dinagdag pa kan consejal na igwa nang pinal na desisyon an Corte Suprema na an mga cooperativa nin electricidad kun dai man rehistrado sa Cooperative Development Authority (CDA) bilang stock cooperative dai libredo sa pagbayad nin buwis kaya dai dapat ipasa kan PHILRECA sa consumedores.

Dapat antes nagsangat nin petisyon sa ERC nagconsulta muna sa mga ginigibong annual general membership meeting (AGMA) kan mga cooperativa nganing magdesisyon iyo an miembros-consumedores. (DPAureus)