Ka-Camaligan

April 4, 2019

 

Lingaw an mga tao na an mga  conquistadores na Espanyol o Kastila kan panahon haling Paracale (Camarines Norte) nag-aragui ngona sa Bikol River pasiring sa Naga na naguin Ciudad de Caceres bilang ikatolong ciudad na namukna sa bilog na Pilipinas. 


An lugar kan Camaligan parte pa kadto kan Naga panu-pano nin mga kamalig sa gilid kan pampang kan salog kaya inapod Camaligan. An mga kamalig sarayan kan mga baroto na gamit kan mga tao. Sa taas kan kamalig an estaran kan mga tao, sa sirong an mga baroto.


Mayo pa kaidtong tinampo kaya sa tubig sana an transportasyon.


Kaya bakong makangalas ngonyan na panahon na naenot an turismo sa Camaligan antes sa Naga.


Kun bangui ngonyan na panahon panu-pano nin ilaw, maliwanagon an magkaibong na pampang kan salog kan Camaligan. Igwa pa nin halabaon na Camaligan Park/Boulevard. An warf na durungan kan mga turistang nagsasakay sa floating restaurant na saro nang mayor na tourist destination sa Bikol. 


Kadakol nang tao an nagpapasyar sa Boulevard na mga taga Camaligan asin Naga asin kataraid na banwaan.


May resto bar na inuman asin karantahan baru-bangui.


Mayo kaiyan sa Ciudad kan Naga na pag alas dies nin Bangui mayo nang tao sa centro.


An problema lang ta an gustong magpa Camaligan haling Naga binabagat kan mga barangay tanod sa boundary asin pigsisitar kan mga tanod ta bawal daa kun an trimobile na nalulunadan mayong pinturang pula. Abalang marhay an mga viajeros. Apektado an mga turista.


Tanu daw ta siring? An Camaligan dating baryo sana kan Naga saka an mga produktong agrikultural kan banwaan  pigdadara asin pinapabakal sa saod kan Naga. Kadaklan kan mga darakulang negosyante sa Naga centro puros mga taga Camaligan. An pampang lugod kan salog kan  Naga sa may Sabang Bridge asin Mabolo Bridgde madiklomon. Disganado an mga turista. An Naga River sa centro kan ciudad madiklomon man.


Panahon na siguro na linigon asin pagayonon kan Metro Naga Development Council an kalabaan kan mga salog haling Naga abot Libmanan asin sagkod Bato tanganing mapakinabangan kan Camarines Sur sa linya nin turismo arog duman sa provincia nin Bohol.


An problema lang sa Camaligan ngonyan na an turism project na hahaluhan na nin politika. Pigtutukdol kan opposition an proyekto kan administrasyon. Dapat an turismo dai paghaluan nin politika nganing mag-asenso arog duman sa Cebu asin Bohol.


An futuro kan pamusong Camaligan Restobar depende sa maguiguin resulta kan eleksyon sa Camaligan asin sa provincia nin Camarines Sur sa Mayo 13, 2019.


* * * * *   
Flash!!! Bagong libro ni Francis T. Nacianceno Jr, an pinaka-enot na editor-in chief  kan Bicol Mail, may titulong “Plucking the Fading Strands”…… before the journey’s end
(The Traveler, As a Journalist and Rural Electrification Worker/ Advocate)

Share on Facebook
Share on Twitter
Please reload