Pagsikad kan karampanyahan sa CamSur, matuninong-PNP

April 4, 2019

An  Philippine National Police Provincial Office (PPO) sa Camarines Sur nagpahayag na matuninong an enot na semana kan karampanyahan sa mga candidato lokal dawa na nagsasalyahan nin mga maiinit na isyu an magkalaban na mga candidato orog na sa puesto provincial.


Alagad an direktiba ni PNP Provincial Director Col. Roderico A. Roy Jr. sa mga Municipal Police Station ipadagos an pagbugtak nin mga Comelec checkpoint sa mga estratihikong lugar nganing estriktong  ma-implementar an operasyon laban sa armed group na posibleng armado nin decalibreng armas.


‘’So far so good’’ si pagsikad kan campaign period kan Marso 29 hasta sa ngonian, sabi ni PD Roy sa flag raising ceremony sa PPO Provincial Office.


Dai palang nahahaloy pigbuyugyag ni Brig. General Arnel Escobal an Camarines Sur saro sa pigsusubaybayan kan PNP asin Philippine Army huli kan armed group na nagdadanay digdi na pigngaranan na Mabulo group.


An armadong grupo posibleng gamiton sa maabot na pirilian kan ibang politico na iyo an pigbabantayan kan mga awtoridad.


Dinagdag pa ni Roy na dawa nakatutok sinda sa pagmantenir kan paz y orden sa maabot na midterm elections  alagad dai man sinda nagpapabaya sa ibang mga responsabilidad.


Igwa na sindang pighaman na plano sa seguridad sa Oplan Summer Vacation kabale na sa mga beach resort na dinadayo nin exkursionista.


Sa maabot na semana santa mapadara sinda nin augmentation force sa Calabanga  Municipal Police Station mantang an lugar na ini pigdadayo nin rinibong   devotos an Amang Hinulid hali sa manlaen-laen na mga provincia. 

Share on Facebook
Share on Twitter
Please reload