VM Legacion, Mendoza masabatan sa business forum

April 4, 2019

Maghahampangan an duwang candidatong alcalde sa Ciudad nin Naga bako pa sa debate alagad sa business forum na pigtalaan sa alas 4:00 nin hapon sa Viernes, Abril 5 sa Villa Caceres Hotel, Ciudad nin Naga.


Sinda Bise Alcalde Nelson Legacion asin an negosyanteng Fortunato ‘’Tato’’ Mendoza parejo nang nagkumfirmar na maatendir sa forum na pinapadrenohan kan Metro Naga Chamber of Commerce and Industry Inc. na pinamamayohan ni Ferdinand Sia.


An duwa enot nang nagpahayag na dapat mag-debate sinda  bako lang sa political  forum asin sa gabos na tema sa pagpadalagan kan lokal na gobierno bako lang sa ngaran na negosyo. 


An agenda sa hampangan kan duwa iyo an isyu sa ngaran na negosyo sa Naga sa tahaw kan padagos nang pag-asenso kan ciudad sa sunod-sunod na pagralaogan kan darakulang mga investor.


Nagpalayog tolos si Mendoza na kun siya an manggana sa maabot na pirilian  lokal  dapat   babaan an pigsisingil na  mga buwis siring kan sa negosyo, propriedad real asin ibaba an sinisingil kan ciudad sa mga saradit na negosyante.


Sinabi man ni Legacion na sa presenting lokal na gobierno kan Team Naga igwa na sindang mga pig-iimplementar na programa sa ngaran na negosyo mala ngani padagos na nag-aarabutan sa ciudad an dakul asin darakulang investor.


Huli kan nagdadakul na mga establisimiento de negosyo, naglalangkaw man an numero na natatawan nin trabajo sa ciudad, sabi pa.


Sa mangyayaring premirong hampangan ninda Legacion asin Mendoza, dakul nang mga negosyante an interesado na mag-atendir nganing makadesisyon sinda kun siisay an dapat magtukaw na masunod na alcalde kan ciudad. (dpa)

Share on Facebook
Share on Twitter
Please reload