SA EL NIÑO PHENOMENON: Calamity loan sa SSS dai pa pig-uurolayan

Bako sa gabos na pagdeklara nin state of calamity puedeng mag-aprobetsar nin calamity loan an mga empleados sa pribadong sektor mayo sa lokal na opisina an pag-aprobar envez sa Social Security Commission.

Sa ngonian an sanga kan Social Security System (SSS) sa Ciudad nin Naga padagos pang nagrerecibe kan loan application hasta sa Abril 22 para sa nakaaging bagyong ‘‘Usman’’ bako huli sa El Niño Phenomenon.

Dai palang nahahaloy nag-declara nin state of calamity an gobierno provincial kan Camarines Sur huli kan El Niño Phenomenon na an apektado iyo an sektor nin paraoma.

Alagad sinabi ni Quinie Agsao, opisyal na parataram kan SSS Branch sa Ciudad nin Naga, kun hali sa National Disaster Risk Reduction Council an deklarasyon ipapadagos ninda an calamity loan huli sa El Niño.

Yaon sa Social Security Commission sa saindang opisina central an poder kun dapat aprobaran an pinakahuring deklarasyon kan LGU CamSur.

Premirong nangyari ngonian na El Niño Phenomenon an Capitolyo Provincial nagdeklara nin state of calamity mantang an ibang kritiko nagtutuyaw na dai man maninigo an sinambit nang deklarasyon ngonian na panahon nin tag-init alagad duda sinda na gagamiton sa politica ngonian na karampanyahan an calamity fund.

Sa sanga kan Government Service Insurance System (GSIS) sa Ciudad nin Naga si Gie Agao, technical assistance kan ahencia nagsabi kaipuhan man giraray hagadon kan LGU sa saindang opisina central mantang an proceso asin mga rekisitos parejo man sana kan nakaaging bagyong ‘’Usman’’.