Causa kan forest fire pig-osipon kan ENRO

April 11, 2019

Retrato kan mga kahoy sa Bukid Isarog  sa Brgy. Panicuason, Ciudad nin Naga na igwa nang mga labut asin tinatagoan nin bugkom (cloud rat) asin an iba digdi estaran nin pulot-putyukan sinusurolo kan ibang parabadang na naging causa kan  forest fire kan nakaaging semana. Sa too an hitsura kan bugkom na pinagbabawal  kan DENR na dakupon alagad kinakarne kan paradakop.                            (City ENRO/PSO)

 

 

An ginigibong pagsulo kan ibang residentes na nag-eestar harani sa pamitisan kan Mt. Isarog nin mga pulot-putyukan asin kan mga may labut nang puon nin kahoy na pig-tatagoan kan bugkom (cloud rat) iyo an causa kan duwang aldaw na forest fire sa Bukid Isarog na sakop kan Barangay Panicuason asin an ibang porsyon sa Calabanga.


Ini an nadiscobre kan City Environmental and Natural Resources Office kan Ciudad nin Naga sa ginibong inbestigasyon ni Alex San Jose, OIC Watershed Division kan ENRO Office kan City Hall sa saindang natipon na mga evidencia kan nangyaring forest fire kan nakaging Lunes asin Martes na nakontrol sana an kalayo sa pagtarabangan kan Bureau of Fire Protection asin kan Public Safety Office, bako sa paagi kan fire truck envez an paghawan kan mga alang nang lugar nganing dai na makabalyo an paglaila kan kalayo.


Tolong hektarya an hiwas kan nadestrosong kakahoyan na nangyari an incidente sa tahaw kan sobrang init kan panahon huli sa El Niño Phenomenon.


An pulot putyukan (honeybees) kaipuhan suloon kan parabadang nganing magdurolag asin magadan an insekto na nabubuhay  asin nakakurapot sa hamis mantang an bugkom (Southern Luzon cloud rat) nag-eestar sa mga labut kan puon nin kahoy asin digdi man sinusulo kan mga paraoma nganing saindang karnehon.


Sinabi ni San Jose, an cloud rat na binabawal kan DENR na gadanon asin dakopon  mantang an pagkadakula kaini garong ikos na masiram an karne (maheheling sa retrato).
 

Share on Facebook
Share on Twitter
Please reload