Double taxation kan LGU CSur nadiscobre

April 11, 2019

Dai tinutugot sa ley an double taxation alagad an Capitol Provincial kan Camarines  Sur  decada  nang nag-iimplementar  kan  ordinansa sa Task Force Kalikasan na nag-iimponer sa mga nagtatransporter nin aggregates na maagi sa CamSur hali sa ibang provincia  na dapat magbayad asin magkua  pa nin sticker sa provincia apesar na igwa nang binayadan na permit.

 

Sobra na yan, double taxation sa mga negosyante asin cuestionable an ordinansa kan provincia asin malinaw na multiple taxation kun hali palang sa provincia nin Catanduanes, Albay maging sa iba pang provincia na nagbayad na nin tamang buwis sa saindang pinaghalian na lugar, alagad obligado pa na maghapit sa Capitolyo Provincial kan Camarines Sur nganing magbayad para sa sticker na mandato kan TF Kalikasan.


Ini an tuyaw ni Atty. Oliver Rodolfo, Legal Officer kan opisina Rehiyonal kan Department of Public Works and Highways (DPWH) kan Bikol kan ordinansa sa TF Kalikasan kan Camarines Sur.


Napatindog an Legal Officer  matapos magpatanid si Francisco Tria, pamayo kan TF Kalikasan  kan  provincia na saindang sisitaron an mga truck na nagtatransportar nin aggregates na nag-aagi sa Camarines Sur hali sa ibang provincia dapat magkua asin magbayad  muna para sa sticker nganing mayong cuestion sa saindang pagbiyaje. 


An  paliwanag man ni Tria, sinda nag-iimplementar sana kan ordinansa kan lokal na gobierno.
Dapat cuestionon kan negosyante an ordinansa huli ta dai tinutugot an pig-iimponer na double taxation, sabi pa ni Atty. Rodolfo.


 An isyu nabutbutan kan DPWH sa pinaapod na Consultation on Quarrying of Aggregates kan nakaaging aldaw ni Presidential Adviser for Bicol Affairs Marvel Clavecilla nganing resolberan an problema sa pagkulang kulang nin aggregates kan mga contratista sa Camarines Sur, Camarines Norte asin Catanduanes na iyo an causa sa na-aabalang pig-iimplementar na mga proyecto sa infrastraktura kan mga District Engineering kan obras publika.


Nagluwas man sa ginibong konsultasyon na pigrereclamo an TF Kalikasan huli kan mga ginigibong harassment sa mga contratistang  nagtatransportar nin mga aggregates na bakong alyado sa politica kan Captitolyo Provincial .


Alagad an isyung ini pinahimotikan man  ni Tria asin kun igwang reclamo sangatan sinda nin caso. 


Huli kan estrictong pag-implementar kan ordinansa an TF Kalikasan nag-aatubang na nin 71 mga caso, sabi pa ni Tria.


Madaling kaulayon si Gobernador Migz Villafuerte kun makua sinda nin permit to quarry asin pagtransportar kan mga materiales na kaipuhan sa mga proyecto sa infrastraktura, sabi pa kan pamayo kan TF Kalikasan.


An ibang contratista na nakaolay kan Bicol Mail nagsabi na si mga congressional district na an representante kaalyado kan Capitolyo Provincial mayong problema sa pagtransportar kan materyales asin sa pag-quarry alagad sa distrito na contra partido kan provincia dakul an dakop kan task force.


Kabale digdi an premir distrito ni Congresista Rolando Andaya asin ika-apat na distrito ni Congresista Arnulfo Fuentebella. (dpa)  

Share on Facebook
Share on Twitter
Please reload