Mga retiradong juez iyo an maimbestigar

April 11, 2019

Dai papalihison kan Corte Suprema an isyu sa nagkaperang  juezez na envuelto sa ilegal na droga tanganing saindang imbestigaran  alagad macrear nin fact finding asin administrative investigation na componido nin mga retiradong juez.


Si Associate Justice Diosdado Peralta iyo an saindang tutukahan nganing magbilog kan fact finding investigation sagcod magpili nin retiradong juezez na iyo an maconducir kan imbestigasyon.


Si Senior Associate Justice Antonio Carpio na naging juespe de honor sa ginibong graduation ceremony sa University of Nueva  Caceres    kan Sabado, Abril  5  nagpahayag kaini sa ginibong press conference kasunod kan pagbuyagyag  kan Philippine Drug Enforcement Agency (PDEA) na igwang treceng mga juez an envuelto sa illegal drug trade.


Tinawan duon kan SC na dai ninda tutugotan na magdanay sa judicatura an illegal  asin corrupt activities kan mga juez sa nasyon.


An mga pangaran dai paman pigbubulgar kan PDEA mientras na nagpapadagos pa an saindang imbestigasyon alagad an SC nangapudan sa ahencia na ipadara na sa sainda an mga pangaran kan treceng juezez nganing punan na an proceso sa imbestigasyon.


Decidido an SC na ma-imbestigaran an treceng mga juez na nakabale sa pinakahuring Narco-list na pinaluwas ni Presidente Rodrigo Duterte alagad an PDEA dai pa nagcocooperar.


Igwang nang enot na pig-iimbestigaran an Corte Suprema na envuelto man an apat na mga juez na kabale sa Narco-list ni Duterte kan nakaaging taon 2016 na kinababalihan ninda Antonio Reyes kan Ciudad nin Baguio, Domingo Casiple kan Aklan, Exequil Dagala kan Dapa-Socorro kan Surigao asin Adriano Savillo kan Ciudad nin Iloilo.  (dpa)

Share on Facebook
Share on Twitter
Please reload