HULI SA FOREST FIRE: Duwang water falls nadiscobre sa Bukid Isarog

April 18, 2019

Retrato kan duwang nadiscobreng water falls sa Bukid Isarog kan Barangay Panicuason, Ciudad nin Naga pighahanapan nin pangaran hali sa suhestiyon kan publiko nganing iyo an itaong pangaran kan Arts, Culture and Tourism Office (ACTO) kan City Hall.                                                                                  (ACTO)  

 

Kun dai pa nagkaigwa nin forest fire sa Bukid Isarog sakop kan Barangay Panicuason, Ciudad nin Naga dai pa madidiscobre an duwang bagong water falls asin ini yaon sa laog kan Bukid Isarog.


Si Alec Francis Santos, jefe kan Arts and Culture Tourism Office (ACTO) kan City Hall nagbuyagyag sa entrevista kan Bicol Mail mantang nasa proceso sa pagresponde an grupo kan City Environmental Resources Office  (ENRO) asin Public Safety Office (PSO) kan ciudad sa nangyayaring forest fire kan nakaaging semana saindang naheling an nag-aawak-awak na tubig kaparejo kan Malabsay falls.


An pagkakadiscobre kan bagong mga water falls dagdag na inbentaryo kan mga potential attraction sa Ciudad nin Naga asin sa iba pang lugar digdi na pigbibisita kan mga lokal asin dayuhan na turista, sabi pa ni Santos.


Sa ngonian pinagigibohan nang paagi tanganing malinigan an dalan na dapat maabot na kan saindang tourist guide para mabisita si mawot magduman mantang ini makakatabang pa sa dagdag na ingreso sa mga residentes kan Barangay Panincuason asin dakulang makukuang experiencia kan mga bisita.


An ACTO naghahapot na sa publiko kun ano an ipapangaran sa duwang water falls na magayon pagdangugon mantang ciertong   magiging dayuhon nin turista sa maabot na panahon.


An sarong water falls may langkaw  nin saes metros na an aagihan garong palibut nin lanub asin  hababaw   na   karigusan asin si ika-duwa nasa treinta metros an langkaw, garong sampulong escalon na edificio.
Pigseseguro kan ACTO na antes nindang bukasan sa lokal maging dayuhan na turista, seseguradohon an safety asin an magiging tourist  guide dapat kumpleto   nin two way radio.   (dpa)

Share on Facebook
Share on Twitter
Please reload