SA DAI PAG-ATENDIR SA CONSULTASYON: Mga sutil na contractor pinatanidan kan OPABA

April 18, 2019

An Office of Presidential Adviser for Bicol Affairs (OPABA) nagpaluwas na nin patanid  sa mga contratista nin mga proyecto sa infrastraktura kan Department of Public Works and Highways (DPWH), na nagsayumang mag-atendir sa imbistasyon kan OPABA sa ginibong Consultation on Quarrying of Aggregates kan nakaaging semana.


‘’Warning sa mga contratista na dai nag-atendir sa consultasyon ngonian, apesar kan pinadarang noticia nganing matabangan sinda sa problema sa pagkulang kulang nin aggregates dai lugod nagpaheling’’
‘’Mapipiritan an opisina na irekomendar ki DPWH Secretary Mark Villar na i-blacklist sinda bilang mga contratista kan obras publika sa mga proyecto sa infrastraktura’’


An OPABA, extension office kan Malacanan sa Bikol na pinamamayohan ni Usec Marvel Clavecilla nagpahayag kaini sa ginibong consultasyon na namumundo siya ta dai nag-aratendir si mga big time contractor nganing resolberan asin matabangan sinda sa problema sa pagkulang kulang nin aggregates.
Pinapasumiter na kan OPABA an mga district engineers kan mga pangaran nin contratista na dai nagsipot sa saiyang imbitasyon nganing patanidan.


Kabale sa mga nag-atendir sa consultasyon na imbitado iyo an mga district engineers kan DPWH sa Camarines Sur, Camarines Norte asin Catanduanes, DENR, PENRO, Task Force Kalikasan, LGU asin sa lado nin mga contratista si mga small time na contractor nagpadara sana kan saindang representante alagad dai nagsipot si mga big time na iyo an may nakuang darakulang proyecto. 


Igwa nang ginigibong aksyon an OPABA sa problema sa pagkulang kulang nin aggregates na iyo an nagiging dahilan sa pagka-abala kan mga proyecto sa Build-Build-Build  program ni Presidente Rodrigo Duterte.


Mawot mangyari ni Clavecilla na matapos an mga  proyecto susog sa target completion kan DPWH mientras na saro ini sa katuyohan kan Build, Build,  Build  program ni Duterte. (dpa)

Share on Facebook
Share on Twitter
Please reload