Semana Santa, Cuaresma asin Politika

April 18, 2019

 

Nagkataon  na kada eleksyon kun bulan na Mayo digdi sa Pilipinas, pig-oobservar kan mga Katoliko o majoriya kan mga Pilipino  an Cuaresma (Lent) saka Semana Santa (Holy Week) sa laog mismo  kan karampanyahan.


Sa radyo, telebisyon, diaryo, social media, billboards etc  gabos tono asin color politika.


Antes pa ngani kan bagong taon asin primerong bulan kaining taon na bako pa daang opisyalmente karampanyahan sabi kan Comelec, politika na an pig-oorolayan paka plantsar lang kan certificate of candidacy (COC). Sa mga orolay-olay sa mga  tindahan, kapehan, restawran pati sa Kantong Putikon an mga taga media,mga pensyonado, mga retirado, mga tsismoso, asin mga babaeng mahilig sa politika an nagdadangadang na eleksyon iyo na an paboritong tema ninda.


An pag-ayuno, absteninsya asin pagsakrifisyo na iyo an dapat mangibabaw sa panahon nin Cuaresma asin Semana Santa nalilingawan na lugod.


Nangingibabaw an political propaganda---fake news parapaganda, intrigas, balubagi, maski sa panahon na pagsakit asin pagkagadan ni Hesukristo na nagdulot nin buhay para sa salvacion  kan kinaban huli  kan satong  kasalan.


Imbes na magsirimba asin mangadyi an kadaklan lalo na an mga juvenes pasiring sa mga ekskursyonan, beach resorts  asin malilipot na malls tanganing mag-orogma, pagpa-pahayahay asin magpalipot-lipot.
Sige na an patiripon kan mga politico kan saindang mga lideres, alipores, asin mga parabakal boto.
An ambos lados nagpopoon nang magtarabogaan, daraklagan laboy asin araponan bata.


Uso na an irensoltohan asin pagminos sa kapwa.


An media na sabi ngani ni Arsobispo Rolly Tirona, Fr.  Fidel Bagayawa asin Fr. Louie Ocsiano kan Caceres sa Media  Lenten Recollection kan naka-aguing Viernes, an dapat na magtabang sa paghanap kan tamang dalan, katotohanan, asin kaliwanagan iyo an taga mga media pero iyo man logod an pagpapalibog kan  sapa sa nagpapamalu-malo sa mga isyu nin isyu nin politika.


An simbahan, ano man na sekta o relihiyon, dapat katabang kan media sa pagtao nin tamang paliwanag sa mga botantes o sa mga namamanwaan. Non-partisan. Apolitical.


An problema ngonyan ta an nagiguin Diyos lugod nin tawo iyo an kuarta asin materyal na bagay kaya an mga politiko o kandidatong makuarta iyo an makosog, maisog asin pwedeng manggarana sa maabot na eleksyon.


* * * * *
Marhay/maraot an Universal Health Law para sa mga Pilipino, sabi ni Dr. Jaime Almora, P.R.O. kan Philippine Hospital Association sa interview kan Ini an Totoo sa tv asin radio kan naka-aguing Sabado.


Marhay ta mayo nang babayaran an mga pasyente, pobre o mayaman, sa mga ospital kan gobyerno.


Alagad sa pribadong ospital may babayaran man guiraray pero may diskwento an Philhealth asin Senior Citizens.


An mga pribadong ospital padagos man guiraray an operasyon para sa may pambayad.


Pero an mga saradit na pribadong ospital baka magkarulugui asin magsara kan saindang operasyon pag-abot kan panahon.


Gulping tawo an madagsa sa gabos na ospital dahil sa Universal Health Law sa paglaom na makakalibre sinda.


Pero bako yan totoo ta cierto y siguro igwa man guiraray gastos.


An pagkaka-iba kan libreng gastos sa pagbulong nin helang duman sa Amerika asin digdi sa Pilipinas iyo na sa Amerika sagot  gabos  kan insurance, sa Pilipinas an gobyerno an nagpapasan kan gabos.


Kulibat ko palan, digdi sa Naga an Bicol regional convention kan Philippine Hospital Association.  Labing 100 an  participantes hali sa mga pribado asin ospital kan gobyerno sa 6 na provincias asin 7ng  ciudades kan Kabikolan.


Ini padagos an konsultasyon kan mga nag-aandam kan Implementing Rules and Regulations (IRR) kan  Universal Health Care Law sa mga doctor, may sadiri nin ospital asin sa publiko en heneral./e

Share on Facebook
Share on Twitter
Please reload