DILG LIWAT NAGPALUWAS PATANID: Opisyales de barangay bawal magkampanya
Daet, Camarines Norte. An Department of Interior and Local Government (DILG) liwat nagpatanid sa mga opisyales de barangay sa Bikol na igilid na an pangangampanya sa mga candidato sa maabot na midterm elections kun habo ninda mag-atubang nin caso.
Igwa nang mga sombong sa DILG Bikol na kadakul nang opisyales de barangay an langtadan kan saindang pangangampanya sa politico alagad hinahalat ninda an mga opisyal na reclamo.
Nagkapera nang mga barangay na envuelto sa partisan political activities an pinapa-imbestigaran na kan DILG sa Commission on Election huli kan padagos na nagkukumiter nin election offenses.
Si Assistant Secretary Jonathan Malaya kan DILG nagpaluwas kan patanidan sa saiyang mensaje kan ini maging juespe de honor sa ginibong Bantayog Festival sa Daet, Camarines Sur na ginatos na namamanuan digdi, opisyales de barangay asin mga opisyales lokal an presente sa okasyon.
Pinapa-imbestigaran na sa Comelec an maabot sa 60 opisyales de barangay asin SK na pigrereclamo na envuelto sa partisan political activities kasunod kan pinadarang surat ni DILG Usec Epimaco Densing III, sinda hali sa mga ciudades kan Taguig, Quezon, Caloocan, sa Misamis Oriental asin Bulacan.
Sinabi pa ni Malaya na igwang pinaluwas na Joint Memorandum Circular an Comelec asin an Civil Service Commission na pinagbabawal sa sainda na maging envuelto sa partisan political activities.
An sinambit na circular dai kabale an Bise Presidente asin Presidente. An padagos na masinutil puedeng suspendiron asin dagos nang haklason sa serbisyo, sabi pa kan DILG.
Segun pa sa DILG na base sa seksyon 389 kan Acta Republika 7610 o mas midbid sa Local Government Code, an trabajo kan mga opisyales de barangay iyo an pagpasunod kan karahayan kan saindang lugar asin pagpasunod kan mga ley asin iba pang pulisya kan gobierno.
Tanganing masangatan nin caso an mga nagsisinutil na opisyales de barangay hinagad kan ahencia sa publiko na kuanan nin video o retrato an mga pasaway na opisyal kan barangay na langtadan nagkakampanya na dapat ipaabot sa Comelec asin DILG.
Sa Ciudad nin Naga, si City Legal Officer Atty. Junjun Bragais kan Ciudad nin Naga nagpahayag man kan saiyang opinyon na solamente an nombradong civil service officers asin empleados, bakong elihidong opisyales an prohibido na maging envuelto sa partisan political activities o ano paman na forma nin electioneering.
Si DILG Officer Lino Boncodin kan Ciudad nin Naga, dai palang nahahaloy nagpaluwas nang patanid sa mga opisyales de barangay na dapat saindang igalang an Joint Memo Circular kan CSC asin Comelec. An ibang mga opisyales de barangay nagpahayag sa Bicol Mail alagad habo nang magpasambit kan saindang pangaran na haloy na an circular kan duwang ahencia alagad mayo mang nangyayari. (DPA)