Operasyon kan SNL marerealisar na sa Hunyo

April 25, 2019

Nilalaoman na antes matapos an ultimong termino ni Alcalde John Bongat magiging operational na an P280 milyon na Sanitary Land Fill (SNL), sa Brgy. San Isidro, Ciudad nin Naga alagad bako sana ining bagsakan nin basura envez magkakaigwa nin dakulang material recovery facility (MRF).


An jefe ejecutivo dai palang nahahaloy personal na nagbisita sa lugar kan SNL nganing maheling niya an kamugtakan kan proyecto na mawot kaining matapos na  dawa an saro muna sa apat na hektaryang SNL.


An proyecto bako sanang estorya  alagad dakul na pigcompleng rekisitos kan DENR antes na punan an construksyon alagad sa pinakahuring report kan Technical Working Group posibleng maging operational an SNL antes magtapos an bulan nin Hunyo ngonian na taon, sabi ni Alcalde Bongat.


Ipapadagos  kan ciudad an waste segregation sa mga barangay mantang igwa nang Seal of Good Local Governance requirement sa barangay sa irarum kan SGLF circular para sa brgy na kaipuhan igwa sindang MRF nganing kuanon nalang kan dump truck si basura na  mayong pakinabang.


Alagad si recyclable material iwawalat sa barangay ta igwang kasabihan sa basura igwang cuarta huli ta ini an rekisitos poon ngonian na 2019. Iyo man ini an pigsisibutan kan lokal na gobierno kan ciudad na magkaigwa na nin mga MRF na kun haen igwa nang enot na 16 sa 27 barangay kan ciudad.


Sinabi pa ni Alcalde Bongat na kun dai kakayahon na saro cada barangay puede man duwa hasta sa tolo cada brgy. ta kun dakula para mas maging paborable sa mga residentes.


An reclamo kan Solid Waste Management Office kan City Hall,  an ibang mga tawo hali sa pagtaraid na banwaan sa laog na kan ciudad nag-aarapon nin mga basura huli ta mayo man sinda nin toltol na solid waste collection system.


An jefe ejecutivo kan ciudad bilang iyo an pamayo kan Metro Naga Development Council nagkaigwa nan in miting sa mga banwaan kan Canaman asin Camaligan sa isyu kan pag-apon nin basura sa laog kan ciudad.


Hinahagad kan ibang LGUs sa ciudad na kun matapos na an SNL tugotan sinda na digdi na magbagsak kan saindang mga basura alagad an isyung ini maagi pa sa Sangguniang Panlungsod asin posibleng marealisar sa masunod na termino, sabi pa.    

Share on Facebook
Share on Twitter
Please reload