Akusasyon ni “Bikoy” vs mga politico fake news, sabi kan PNP

May 2, 2019

Isinikwal kan PNP Bicol asin kan Naga City Police Office (NCPO) an akusasyon contra sa nagkaperang mga politico asin negosyante sa Bikol na yaon sa listahan kan narcopoliticians.


Sinda Police Major Malou Calobaquid opisyal na parataram kan Camp Semion Ola kan PNP Bicol asin P/Col. Felix Servita Jr., jefe kan NCPO sa magkasuhay na pahayag na mayong prueba o mga evidencia an akusasyon asin malinaw na fake news asin politically motivated an pinaluwas na videos kan nagpapabistong ‘’Bikoy’’ na an mga envueltong politico asin negosyante kabale sa mga sindikato sa ilegal na droga sa Bikol.


Nagtutubod an duwang opisyal kan PNP na dapat maglikay an publiko sa fake exposes asin mayong katutoanan na impormasyon sa Bikoy video.


Fake  news  asin politically motivated mantang panahon ngonian nin politica, sabi ni City Director Servita.
Sa pinaluwas na nagkaperang mga narcopoliticians  ni Presidente Rodrigo Duterte dai palang nahahaloy mayo sa listahan an pigsasabing politico sa Bikol.


Kabali sa mga pigbuyagyag ni ‘’Bikoy’’ na pigsasabit sa sindicato sa droga sa rehiyon Bikol sinda, Congresista Fernando Gonzales kan tercer distrito kan Albay, Gobernador Edgardo Tallado kan Camarines Norte, dating Gobernador asin Congresista Luis Villafuerte kan Camarines Sur, Gobernador Joseph Cua kan Catanduanes, Vokal Krunimar Escudero kan Sorsogon, asin an mga negosyanteng sinda Elizaldy Co kan Albay, Tomas Enrile kan Ciudad nin Naga, asin Tess Rañola alagad pig-ayon pa an pangaran ni Victor Lorenzo Rosales na detindo na sa carcel huli ta nag-aatubang na sa casong pagbalga kan Acta Republika 9165 o mas midbid sa Comprehensive Dangerous Drugs Act of 2002.


Binansagan sinda ni ‘’Bikoy’’ na Quadrangle Group.


Sa isyu na igwang drug laboratory sa basement kan sarong mall, sarong kaputikan huli ta an mga awtoridad iyo an dapat makaaram tolos kaini, sabi pa kan PNP.


Sinda Tallado asin Villafuerte sa magkasuhay na mga pahayag sa media, pinahimotikan an akusasyon asin planong hagadon sa NBI na imbestigaran an pinakuriyat na video nganing sangatan ninda nin caso.
Maging an ibang mga dayupot na amigo ni Enrile dai nagtutubod sa video ni ‘’Bikoy’’.
  

Share on Facebook
Share on Twitter
Please reload