ISYU SA CAMPAIGN CONTRIBUTIONS: 2 ECs nagsayumang magtabang sa Philreca

May 2, 2019

An Camarines Sur I Electric Cooperative (Casureco I) Inc. asin an Sorsogon I Electric Cooperative (Soreco I) iyo sana an nanindugan  sa mga electric cooperative (ECs) digdi sa Bikol na dai   magtao  nin campaign contributions sa party-list group kan Philippine Rural Electric Cooperatives Association (Philreca) sa pagtubod ninda bakong maninigo asin cuestionable.

 

Sabi kan National Association of Electricity Consumers for Reform Inc. (Nasecore), na pinamamayohan ni Pete Iligan na ilegal an padagos na pagrecibe nin campaign contributions kan Philreca sa mga cooperativa asin nagsangat na nin petisyon sa Comelec na dapat cancelaron an rehistrasyon kan Philreca bilang party-list.


Pagbalga kan Seksyon 95 kan  Omnibus   Election Code   an  rason kan  Nasecore sa petisyon na cancelaron an saindang registration bilang party-list.


An rehiyon Bikol igwang onseng (11) cooperativa nin electricidad, afuera kan Sorsogon II Electric Cooperative (Soreco II) na rehistrado bilang stock cooperative sa Cooperative Development Authority (CDA). 


Igwang pagtugot an National Electrification Administration (NEA) sa campaign contributions kan mga cooperativa nin electricidad alagad duda an opisyales asin empleados kan Casureco Uno sa posibleng maging aksyon contra sa saindang general manager sagcod na hanapan nin dahilan kan NEA asin Philreca.


Nganing ulangon an ano man aksyon kan NEA contra sa saindang general manager, an mga empleados asin opisyales kan cooperativa nagkaigwa nin protesta sa paagi kan ‘’Run for GM, an tunay na nakikipaglaban sa electrification’’.


Ginibo an simpleng protesta asin pagcontra sa ano man na lakdang kan NEA  kan nakaaging Lunes sa Libmanan, Camarines bilang saindang suporta asin pagtitiwala sa kakayahan ni Alsisto na magpadagos bilang GM. 


Sa liderato ni Alsisto, mantenido sagcod ngonian an Triple A na iyo na an pinakalangkaw na categorization kan NEA sa sarong cooperativa nin electricidad base sa saindang mga acomplisimiento asin liderato.
Sa petisyon kan Nasecore sa Comelec saindang hinuhurot na dapat cancelaron an registration kan party-list group kan Philreca huli kan suboot pagrecibe nin illegal campaign contributions hali sa mga ECs na nag-tototal na sa P10 milyon, dai pa kabale si contribusyon kan ECs hale sa Bikol.


Sa saindang katorceng pahina petition for cancelation of registration, sinabi kan Nasecore P3-M an tinao sa Philreca kan Davao del Sur Electric Cooperative, P2-M hali sa Isabela Electric Cooperative II asin tig-on milyon pesos hali sa Zambales 1 Electric Cooperative Inc., Pampanga III Electric Cooperative Inc., Peninsula Electric Cooperative Inc. Pampanga 1 Electric Cooperative Inc., asin  Zambales II Electric Cooperative Inc.


An ibang ECs an saindang palusot nagtaong kontribusyon alagad pinaluwas sa record na an fondo gagamiton  sa ‘‘Advocacy Fund’’.


An evidencia kan Nasecore iyo an mga tsikie, deposits slips asin resolucion kan junta directiva na nagpapatunay an mga ECs nagcontribuer nin milyones pesos sa Philreca.


Sa lado kan Philreca, saindang sinabi na ‘‘baseless and malicious allegations political harrasment’’ an akusasyon kan Nasecore.


Sa pinaluwas na statement, sinabi pa an alegasyon kan Nasecore malinaw na political harassment.


An Philreca cuarenta anyos nang nagdadanay bilang umbrella organization kan 121 ECs sa nasyon. An saindang misyon para sa karahayan kan ECs asin miembros-consumdores.

Share on Facebook
Share on Twitter
Please reload