Obreros disganado sa gobierno ni Duterte

May 2, 2019

Abot sa cinco mil na mga obredo, paraoma, progresibong grupo asin iba pang sektor hali sa limang distrito kan Camarines Sur an nagparticipar sa protest rally sa Labor Day  kasoodmang hapon na ginibo sa Plaza Quezon kan Ciudad nin Naga na saro sa natukar na isyu iyo an nagpalyar na pangako ni Presidente Duterte na tataposon na an ENDO.


Nagtiripon an grupo sa Bicol Central Station asin nag-martsa pasiring sa mga mayor na kalye sa centro kan Ciudad nin Naga sagcod na nagtiripon sa Plaza Quezon na bitbit an saindang mga placards sa mga inagrangay laban sa presenteng gobierno.


Si Nelsy Rodriguez lider kan Bayan Muna sa Camarines Sur nagsabi na disganado an obreros sa paagi kan Kilusang Mayo Uno (KMU), na saindang pigdedenunciar an mga pangako kan administrasyon Duterte na sagcod sanaman sa panahon kan saindang presidential campaign.


Saindang pighahagad sa gobierno nasyonal na gibohon nang P710 an saindang minimum wage huli ta grabe na an padagos na pagralangkawan kan mga mayor na produkto sa mercado epekto kan excise tax sa petroleum product na binabawi man sa pagpalangkaw nin presyo kan lana.


Alagad dai man narealisar padagos na natitinaktinakan an deretso kan obreros sa Camarines Sur maging sa iba pang rehiyon.


An saindang tema iyo an ‘’Manggagawa Magkaisa, Ipagtanggol ang Karapatan, Itaguyod ang Militanteng Pakikibaka Laban sa Pahiran, Tuta at Pasistant Diktaduryang US-Duterte.


Tinuyaw ninda na apesar kan krisis sa ekonomiya padagos na pigtutulod ni Duterte an charter change nganing tawan nin panahon an fekeng pederalismo sa nasyon.

Share on Facebook
Share on Twitter
Please reload