PNP, PA mawarak kan saindang tropa sa brgys sa aldaw kan pirilian

Duwang semana antes kan pirilian sa Mayo 13, 2019 an Philippine National Police sa Bikol andam na kan saindang kapupulisan na iwawarak sa mga polling center sa mga barangay.

An provincia nin Masbate iyo an may halangkaw na numero nin mga awtoridad na kinababalehan nin miembros kan PNP asin Philippine Army mantang an provinciang ini dai nahahalian kun panahon nin eleksyon igwa insidente na may relasyon sa pirilian.

Sa anom na provincia kan rehiyon Bikol an Masbate iyo an may halangkaw nin mga caso huli sa maabot na pirilian.

Kabale sa pigbabantayan na magiging mainit an pirilian iyo an Camarines Sur huli kan mga na enot na patutsadahan kan duwang candidatong gobernador na sinda incumbent Governor Migz Villafuerte asin Congresista Rolando Andaya Jr. kan premir distrito.

An Bicol PNP na pinamamayohan ni Brig. Gen. Arnel Escobal asin an Commission on Election sa Bikol na pinamamayohan ni Director Noli Pipo nagkapera nang beses naggibo kan saindang coordinating conference kabale an Philippine Army nganing ciertohon na magiging matuninong an maabot na midterm elections.

Sinabi ni Escobal na ngonian na Jueves, Mayo 2 magkakaigwa sinda nin final conference kan Comelec asin kan Phil. Army mientras na nag-arabotan na an mga election paraphernalia.

Gabos na mga PNP Provincial Office igwang augmentation force kan PA asin PNP na iwawarak man sa mga barangay antes pa kan pirilian sagcod sa pagtapos kan canvassing.

Sinabi man kan Comelec Bikol na magkakaigwang na sinda nin final testing kan Voters Counting Machines (VCM) sa maabot na Mayo 6 nganing antes kan aldaw nin pirilian aram na ninda kun igwa pang problema na dapat resolberan nin amay.