ISYU SA CENTRAL BUS TERMINAL: City Hall pinapabayad kan corte nin Php3-M danyos

May 9, 2019

Ginana kan FPM Corporation na pigrerepresentaran kan saindang  presidente Fortunato ‘’Tato’’ Mendoza, dating operator kan Central Bus Terminal na ngonian Bicol Central Station an caso sa isyu sa terminal contra sa lokal na gobierno kan Ciudad nin Naga asin pinapabayad kan RTC Branch 19 an City Hall nin nagcacantidad P1,000,000.00 bilang moral damages, P500,000.00 bilang temperate damages, P500,000.00 bilang exemplary damages, asin P1,000,000.00 bilang Attorney’s fees huli kan bakong tama sa ley an ginibong pag-takeover sa CBT. 


Sa lado kan City Hall, sinabi ni Alcalde John Bongat saindang pigrerespeto an desisyon kan jusgado alagad dai pa tapos an laban legal maplantiar sinda nin motion for reconsideration mantang bako pang pinal an desisyon kan RTC. 


Sa press conference kasoodma, sinabi ni Mendoza an desisyon pinaluwas kan Mayo 6, 2019 ni Juez Erwin Virgilio Ferrer, alagad iginilid an hinahagad na injunction laban sa City Hall.


Si Mendoza nagsangat nin Civil Case sa corte na may RTC 2013-0114 for Injunction, Breach of Contract, Specific Performance and Damages with prayer for a Temporary Restraining Order or Status Quo Order and Writ of Preliminary Injunction, and for Judicial Declaration of Nullity of ExecutiveOrder Nos. 2013-030 and Sangguniang Panlungsod Resolution No. 2013-308.


An caso sinangat kan Deciembre 2013 huli kan alegasyon sa pagbalga kan saindang deretso sa saindang contrata na nagtutugot na dapat magpadagos pa siya sa pagpadalagan kan Central Bus Terminal.


An hinahagad na pag-isyu nin injunction contra sa City Hall dai naman tinugotan kan corte envez pinapabayad an ciudad nin mga damages na nag-tototal sa tres milyones pesos.


An ginibo kan City Hall sa fuersahan na pag-takeover malinaw na pag-abuso sa poder mantang mayo pa nganing  pinal na desisyon an jusgado, kaya pinapabayad an ciudad nin damages, sabi pa ni Mendoza.


Piglinaw ni Mendoza na kun manggana siya sa pirilian sa Mayo 13 mayo siyang plano na ipadagos niya an pagpadalagan kan CBT huli kan conflict of interest alagad isusubasta niya sa mga interesadong magpadalagan kaini.

 

 

TATO NAGSANGAT ELECTION VIOLATION CASE VS LEGACION


Nagsangat nin electoral case an kandidato pag ka alcalde na si Tato Mendoza kontra sa saiyang karibal na si Nelson Legacion sa COMELEC Law Department sa Pili, Camarines Sur kan Mayo 3, 2019.


Si Tato nagsangat nin reklamo kontra ki Legacion nin huli sa pag-balga kan Sec. 27 kan COMELEC Resolution  10488, kun saen  an  mga billboards asin iba pang porma nin election propaganda dapat hinale na tulos sa laog nin 72 oras bago an Marso 29 na iyo an opisyal na pagpuon kan karampanyahan sa local level.


Pinagsaysay ni Tato an mga pagbalgar sa paagi kan mga litrato kan mga illegal billboards asin campaign propaganda na may katakod na diyaryo petsado 26 kan Marso 2019.


Nanotaran na an nasambit na illegal billboards nakasakat pa giraray durante kan petsa na pinagbabawal na ini. Maheheling an mga billboards sa mga tinampo kan Magsaysay Ave., Del Rosario, Tabuco, asin sa Plaza Quezon.


An iba pang illegal na election propaganda maheheling na nakapaskil sa Del Rosario Elementary School, Pacol Elementary School, sa Naga City Cemetery, asin sa sarong waiting shed sa Barangay Balatas.
Segun ki Tato, isinangat niya an reklamo tanganing matuldokan na an mapang abusadong gawigawi kan mga nakatukaw.


“Kaipuhan magkaigwa nin patas na ralaban sa laog kan karampanyahan. An City Hall daeng ontok na ginagamit an mga rekursos kan govierno asin mga programa para sa saindang sadiring interes. Ang mga benipisiyaryo kan QUEEN, Sanggawadan, asin 4Ps padagos man na hinaharas.


Tinatarakot sinda na tatangkason sa programa kun masuporta sinda sa balyong lado,” sosog ki Tato.
“Pinapaheling kaini na an ley dapat sinusunod,” dagdag ni Tato.


An eleksyon sa Naga maririsang iba na ngonian nin huli kan kampanyang pinaguiguibo kan Team Legacion kompara sa panahon ni depuntong Jesse Robredo kun saen an mga lalawgon kan mga kandidato limitado sana sa kun ano an sinasabi kan COMELEC. An mga darakulaon na billboards ginagamit na ngonian kaibahan na mga proyekto kan govierno.
 

Share on Facebook
Share on Twitter
Please reload