Eleksiyon sa Masbate, matuninong - JOTG

May 16, 2019

An provincia nin Masbate na cada pirilian nasa irarum kan Comelec control, alagad sa nagtapos na midterm elections kan Mayo 13 heneralmente naging matuninong an paz y orden huli kan higot na seguridad kan Joint Operation Task Group (JOTG).


Ini base sa nagtapos na pirilian hasta sa pagtapos kan mga escutenyo sa mga polling center sundo sa paghatud kan mga election paraphernalia sa mga board of canvassers.


Igwang duwang armed group an Masbate na kapot nin mga politico dai nakabuelo huli kan mga operasyon kan task group.


Si Col. Teddy Toribio, pamayo kan task group kabale an mga elementos kan Philippine National Police sa Bikol sa pamamayo ni Brig. General Arnel Escobal sa magkasuhay na mga pahayag naheling ninda an matuninong na pirilian sa suporta kan comunidad asin kan mga politico.


Nakatabang si amay na pagkakadakop kan duwang miembros kan duwang armed group sa provincia sagcod na nabantayan kan task group nganing macierto an matuninong na pirilian.


Sinabi ni Toribio na igwa man giraray nin mga insidente nin harassment asin pagprobar na maghasok nin kariribokan alagad amay nindang nakontrolan nganing dai makahiro.


An PNP asin Philippine Army parejong nagwarak kan saindang tropa sarong bulan antes pa kan pirilian nganing dai makabuelo an mararaot na elementos orog na an armed group, sabi pa kan task group.


An misyon kan task group magpapadagos sagcod sa pagtapos kan election period sa Hunyo 13, 2019.


Afuera kan harassment kan ibang mga lider nin candidato, sinabi man ni P/Major Malou Calubaquib, opisyal na parataram kan Camp Semion ola igwa man giraray sindang nagkadarakop na envuelto sa vote buying na nakakumfiscar sinda nin labi sa 400 mil pesos kadakli kan mga nagkadarakop hali sa provincia nin Masbate.


Sa kaenterohan kan rehiyon Bikol naging matuninong an pirilian afuera kan katorceng pagsinutil sa liquor ban na kun haen 41 an mga nagkadarakop sagcod na dagos nang sinangatan nin caso.

Share on Facebook
Share on Twitter
Please reload