Mga contrabida sa airport proj., PDA daraog sa pirilian

May 16, 2019

Tigaon, Camarines Sur – Haros enterong isinikwal sa ika-apat na distrito kan Camarines Sur (Partido area) an mga politico na anti-development mala ngani puon sa gobernador, vocal, diputado sagcod sa mga elehidong alcalde nagkadaraog afuera kan sarong re-eleksiyonista sa nagtapos na midterm elections.

 

Si Abogado Awel Llaguno, board member elect nagsabi sa Bicol Mail na si mga nasa likod kan kahurotan na tunawon an Partido Development Authority (PDA) asin nag-uulang kan pagbugtak nin aeropuerto sa San Jose, CamSur nagkadaraog sa pirilian lokal.


Sinda re-eleksiyonistang vocal Maymay Pacamara asin Badong Simando na iyo si nangenotan sa junta provincial kan Camarines Sur sa pagpasar nin resolucion na hinahagad sa Malacañan na bungkagon na an PDA, parejong rata sa pirilian maging si re-eleksiyonistang  Gobernador Migz Villafuerte, dinaog sa distritong ini ni dating Majority Floor leader Rolando Andaya Jr. 


Nahadit an mga taga Partido area kun nadagos an pagtunaw kan PDA huli ta ma-aapektaran an serbisyo sa water system sa saindang mga banwaan.


An isyu sa pagtunaw kan PDA pigtulod kan Capitolyo Provincial  sa pamamayo ni Gobernador Migz Villafuerte asin pinaboran kan Malacañan alagad padagos pang piglalaban sa corte ni Congresista Noli Fuentebella asin pendiente sagcod sa ngonian sa jusgado. 


Sa lado kan gobierno provincial, an saindang kahurotan na dapat tunawon na an PDA huli ta padagos ining nalulugi asin tubod na dai ma-aapektaran an serbisyo kan water system mantang pueding padalaganon ini kan Capitolyo.


Sinabi man ni Consejal Edwin Larra kan LGU Garchitorena na dai sinda tubod an isyu sa PDA iyo an nakadaog sa mga candidato ni Villafuerte sa saindang distrito mientras na ipaliwanag an dahilan kun tano ta dapat ibasura na  ini.


Bako lang an isyu sa PDA, an mga alcalde asin vocal na kaalyado ni Villafuerte nagpadara nin petisyon sa DOTr na nagcocontra sa pagbugtak nin aeropuerto sa San Jose, CSur sa rason na envez kaini, ipadagos an expansion  project kan Naga Airport sa Pili, Camarines Sur.


Si Congressman elect Arnie Fuentebella, na gana sa pirilian contra ki Nonoy Villafuerte Magtuto, pinsan kan gobernador nagpahayag na mayo na si mga contrabidang alcalde na kontra sa airport project sa Partido area asin saiyang ipapadagos para sa pag-asenso kan saindang distrito.


Sa sampulong mga candidatong alcalde na kaalyado kan Congressman elect walo sa sainda an mga ganador na kinababalihan ninda, Nelson Bueza kan Garchitorena, Marcel Pan kan Goa, JB Pilapil kan Lagonoy, Jimmy Delena kan Presentation, Karen Polinga kan Siruma, Chiqui Fuentebella kan Tigaon, Jovi Fuentebella kan Sagnay,  asin Marilyn Co kan Caramoan mantang duwa sana an nang-gana sa campo ni Villafuerte na sinda Atty. Ruel Tuy kan Tinambac asin Dr. Mac Chavez kan San Jose.

Share on Facebook
Share on Twitter
Please reload