Senado maimbestigar sa mga anomaliya vs Philreca

May 16, 2019

An Committee on Energy sa senado nakatalaan magkundonir ni  imbestigasyon sa reclamo kan general manager kan Camarines Sur I Electric Cooperative (Casureco l), sa ginibong paghuthot nin fondo kan Philippine Electric Cooperatives Association Association (Philreca) nganing obligaron an mga electric cooperative (ECs) kan nakaaging eleksyon na magtaong campaign fund contributions sa apat na party-lists kan mga cooperatiba nin electricidad.


Si General Manager Ana Sylvia Alsisto nagpahayag sa miembros kan media na saiya nang sinangat an reclamo asin naghahalat nalang kan ipapaapod na senate inquiry mantang andam niyang atubangon asin ipresentar an mga evidencia laban sa envueltong opisyales kan Philreca.


Sa paagi nin mga resolucion kan junta directiba, rank and file asin supervisory union kan Casureco I pigsusuportaran ninda an panindugan kan saindang  general  manager sa  pagprotehir  kan fondo kan miembros-consumedores.


Sa pinaluwas na statement kan GM na sa ginibong miting National Association of General Managers of Electric Cooperative (NAGMEC), Bicol Chapter pigdetalye digdi na an lambang EC kaipuhan magtaong kontribusyon nganing makatipon nin P70 milyon na campaign fund. An rehiyon cinco dapat makatipon nin P5.5M asin sa Casureco I dapat magcontribuer nin P489 mil.


Dai pa maako kan GM an  estratihiya  kan junta kan Philreca nganing makatipon nin milyones pesos na fondo, an ECs dapat mag-aprobar nin board resolutions nganing magtaong year-end incentives sa mga empleados asin an NEA  Administrator ciertong aaprobaran ini.


Oras na aprobaran, an payroll sa incentibo dapat firmado kan mga empleados alagad an kabanga o cincuenta por ciento itataong kontribusyon sa campaign funds. Pig-halimpawa kun P10 mil alagad an P5 mil para sa kontribusyon sa Philreca.  Kun an sarong EC igwang 200 na empleados aabuton sa on milyon pesos an cada EC.


Naging cuestionable pa ini sa GM kan Casureco  Uno huli ta dai nagtugot an Philreca na mag-isyu sinda nin opisyal na recibo.


An pigmamandong ini sarong ‘’hideously and lawfully taking member-consumer’s fund’’, sabi pa.


An National Association of Electricity Consumers for Reform (Nasecore) Inc. pigreclamo na sa Commission on Election an ilegal na pagrecibe nin campaign contributions kan Philreca.


Si Pete Iligan, presidente kan Nasecore nagsangat nin petisyon sa commission na naghuhurot na dapat cancelaron an rehistrasyon kan Philreca bilang party-list.


Saiyang sinabi na malinaw na pagbalga sa Seksyon 95 kan Omnibus Election Code nganing cancelaron an rehistrasyon kan Philreca bilang  party-list asin tolo pang iba.
 

Share on Facebook
Share on Twitter
Please reload